KOMUNIKADO DI KUERPO POLISIAL KÒRSOU Detenshon pa violashon di e Lei di Arma di Kandela.


KOMUNIKADO DI KUERPO POLISIAL KÒRSOU
289 / 2017
31 yüli 2017
Detenshon pa violashon di e Lei di Arma di Kandela.
Departamentu di Komunikashon i Prevenshon
KUERPO POLISIAL KÒRSOU SIRBI I PROTEHÁ

Djaluna 31 di yüli 2017, alrededor 01.30 ‘or di mardugá, Sentral di Polis a dirigí un patruya na Bapor Kibra na un establesimentu, despues di a risibí yamada indikando ku un bewaker tin un persona detené ku tabatin un arma di kandela den su poder. E patruya ku a yega na e sitio a tuma e sospechoso ofer i a konfiská e arma di kandela. For di un investigashon ku e agentenan a hasi na e sitio un di e bewakernan a deklará, ku via di su portofon el a tende un di su koleganan ta pidi asistensia, yegando na e sitio el a topa ku un hòmber ta kore den su direkshon. Mes momento el a notá ku e homber aki a saka un arma di kandela i dirigí esaki riba dje. E bewaker na su turno tambe a saka su arma di kandela i a ordená e sospechoso pa benta su arma abou i drumi abou na suela loke ku e sospechoso a hasi tambe. Miéntras tantu e otro koleganan di e bewaker a yega serka i a detené e sospechoso. En konekshon ku esaki polis a detené e hòmber R.V.U. nasé na Kòrsou di 19 aña di edat komo sospechoso di violashon di e Lei di Arma di Kandela.
A presentá e sospechoso dilanti un fiskal ouksiliar ku a ordená su enkarselamentu pendiente mas investigashon.

Advertisements