Djadumingu 13 di ougùstes 2017 BAN SKOL BÈK NÈCHI PELÁ na SENTRO DI BARIO SOUAX


Djadumingu 13 di ougùstes 2017 BAN SKOL BÈK NÈCHI PELÁ na SENTRO DI BARIO SOUAX

Djadumingu 13 di ougùstes próksimo Fundashon Pro Souax ta organisá pa di 7 biaha, na Sentro di bario Souax su anual aktividat “BAN SKOL BÈK NÈCHI PELÁ”.
E siguiente barberianan ta koperá ku Fundashon Pro Souax den e proyekto aki: Fresh Fresh Barbershop, The Professional Barbershop, Hair Creations 2 i Barberia Cinto.
For di 9or di mainta te ku 4or di atardi muchanan i hobennan di Souax, Gato, Zegu, Ser’i Kandela i bisindario lo por haña un nèchi pelá pa kuminsá aña eskolar 2017-2018.
Muchanan te ku 12 aña lo por pela grátis. E kontribushon pa pelá di 13 t/k 18 aña: ta 5,00 i studiante riba 18 aña: ta 7,50
Den e proyekto aki Fundashon Pro Souax ta koperá tambe ku “Fundashon tur mucha mester kome”. E koperashon ta enserá ku klientenan di te ku 12 aña di “Fundashon tur mucha mester kome” tambe lo por pela kompletamente grátis.
Hinter dia, bou di guia, e muchanan lo por: hunga den parke infantil; hasi diferente tipo di deporte i wak pelíkula grátis riba un pantaya grandi. Fundashon Pro Souax ta spera ku mayornan di bario di Souax, Gato, Zegu, Ser’i Kandela i bisindario lo hasi uzo di e oportunidat aki pa laga nan yu bin pela djadumingu 13 di ougùstes na Sentro di bario Souax.
Teniendo kuenta ku e gran kantidat di mucha ku a bin pela aña pasá, Fundashon Pro Souax ta rekomendá tur mucha i hoben interesá pa pela, pa bin trempan i asina garantisá nan pelá.
Pa mas informashon por tuma kontakto ku dirigentenan di Sentro di bario Souax na telefòn 868-8170 / 522-8170 òf 561-2832 .

Advertisements