Hóbennan lo presentá kampaña ‘Rollover’ den diferente forma di arte: Digicel orguyoso di por sostené Art Rules Curaçao 2017


Hóbennan lo presentá kampaña ‘Rollover’ den diferente forma di arte: Digicel orguyoso di por sostené Art Rules Curaçao 2017

WILLEMSTAD: Maestronan for di diferente parti di mundu ta na Kòrsou pa duna vários workshop, tur esaki relashoná ku Art Rules. Durante 2 siman lo enfoká riba arte, baile, teatro, músika, skibimentu kreativo i trahamentu di pelíkula. E hóbennan lo risibí lès dor di instruktornan profeshonal den kada área spesífiko.

Digicel ta kontentu di un bes mas por kontribuí ku e proyekto aki. “Art Rules Curaçao ta kuadra perfektamente ku e liña di maneho di Digicel. E aña aki nos tabata ke involukrá e programa un poko mas den nos kompania; e kampaña ‘Rollover’ ta un bon okashon. Nos ta sigur ku e 2 simannan di Art Rules lo ta yen di aprendisahe i ta deseá tur hóben hopi éksito”, esaki di akuerdo ku Jorge Cuartas di departamentu di merkadeo pa Digicel Kòrsou. E hóbennan di Art Rules lo forma parti di e kampaña ‘Rollover’ ku Digicel i lo presentá e kampaña den diferente forma; por menshoná un obra chikitu di teatro, video i fotografia artístiko. Lo por mira esakinan riba entre otro e Snapchat i Instagram di Digicel Korsou.

Un total di 120 hóben lo partisipá na e tayernan ku ta keda ofresé den Art Rules. E tayernan ta tumando lugá na Kura di Arte te ku 4 di ougùstùs 2017. Na final di e 2 simannan lo tin un presentashon grandi na World Trade Center, na unda ku e hóbennan lo demostrá na pueblo di Kòrsou tur loke ku nan a siña. E presentashon aki ta tuma lugar riba djasabra 5 di ougùstùs 2017. Digicel ta spera ku e hóbennan disfrutá di nan partisipashon na Art Rules, pero mas ku tur kos pa despues nan sigui desaroyá nan talento den nan bario òf na skol. Pa mas informashon di e evento por bishitá e página di Facebook di Digicel http://www.facebook.com/DigicelCuracao òf riba Instagram di Digicel Curacao.

Advertisements