Minister Koeiman ta reuní ku trahadónan i partisipantenan di Fundashon Tayer Soshal Sta. Martha


Minister Koeiman ta reuní ku trahadónan i partisipantenan di Fundashon Tayer Soshal Sta. Martha

WILLEMSTAD – Minister Hensley Koeiman, konforme palabrashon ku el a hasi ku maneho diario i direktiva di Fundashon Tayer Soshal, djamars mainta a reuní den un promé instante ku e trahadónan di e fundashon i mas lat mainta ku e partisipantenan di e tayer soshal na e hístoriko sentro na Sta. Martha. Durante ámbos enkuentro Minister Koeiman a skucha inkietutnan di esnan presente. Tambe por bisa ku a skucha diferente sugerensha i idea di tantu trahadónan, komo partispantenan kiko nan ya mira nesesario pa por tin un operashon mas efikas i ambiente di trabou i konvivensia mas plasentero na FTS.
Minister Koeiman di su banda a informá di su vishon i plannan i a bisa ku e ta mira ku e sentro tin hopi potenshal. Minister Koeiman alabes a kontestá e preguntanan di trahadónan i partispantenan. Finalmente e titular enkargá ku e karterá Desaroyo Soshal, Labor i Bienestar a bisa ku e ta konsiente ku tin un kaminda largu pa kana, i ku e retonan ta eksigí atenshon, pero ku e ta konvensí di ku boluntat di tur stakeholder lo por yega na e potenshal máksimo di Fundashon Tayer Soshal Santa Martha.

Advertisements