Karta ku pregunta kua ta e maneho nobo di Presidente di Parlamento aktual pa ku yamamentu di reunionnan


Willemstad 3 ougùstùs 2017

Presidente di Parlamento
Sr. J. Millerson
P/a Wilhelminaplein z/n
Presente

Sr. Presidente,

Frakshon di Movementu Futuro Kòrsou (MFK) kier a aserka bo persona ku lo siguiente: Frakshon di MFK a tuma nota ku den e siman di reunion di dia 8 di ougùstùs próksimo bo persona a pone un punto di agènda ku nos frakshon a hasi un petishon for di dia 22 di mei 2017. Teniendo na kuenta ku reglamentu di òrdu (RvO) ta stipulá ku den 14 dia e reunion mester wòrdu yama, a straña nos ku esaki no a sosode, hinter luna di yüni promé ku reseso Presidente por a kumpli ku nos petishon. Awor siman di reunion den ougùstùs nos petishon di 22 di mei ta bini komo punto di agènda # 2 miéntras e punto di agènda # 1 a wordu pidi dor di miembronan di parlamento (di koalishon) ku un punto di agenda similar apenas di dia 1 di ougùstùs último.

Pa klaridat Frakshon di MFK kier haña aklarashon riba e maneho ku bo persona ta hibando i ta bai sigui hiba, riba e situashon aki Frakshon di MFK kier hasi bo persona e siguiente preguntanan:

1. Kua ta e maneho ku bo persona ta i lo bai hiba pa ku petishonnan di reunion? Lo kumpli ku 14 dia manera stipula den RvO ?

2. Kua ta e krtiterionan ku bo persona ta bai tene kuenta kuné ora di fiha fecha di reunionnan? No ta asina ku petishonannan ta haña prioridat segun fecha di entrega i entrada ?

3. Pa bo persona, tin diferensha den petishonnan hasi dor di e 3 miembronan di Parlamento ku firma pa un reunion den kuadro di nan partispashon den Koalishon/Mayoria òf esnan ku ta forma parti di Oposishon/Minoria ?

4. Kua maneho bo persona ta bai hiba pa ku reunionnan yama den kuadro di urgensha, ku otro palabra, reunion ku lo tin ku tuma luga mas promé ku e 14 dianan stipulá den nos RvO ?

Frakshon di MFK ta spera di risibí un kontesta di bo persona riba nos karta lo mas pronto posibel.

Na nòmber di Frakshon di MFK nos ta keda pendiente di bo kontesta,

Atentamente,

Frakshon di MFK

G.F. Schotte
Lider di Frakshon

Advertisements