Salú mental na boka di trabou


Salú mental na boka di trabou

Willemstad – Tur aña riba 10 di óktober mundialmente ta para ketu na e tema di salú mental. E aña aki WHO/ PAHO a skohe komo tema ‘Salú mental na boka di trabou’. Ta kalkulá ku un di kada sinku trahadó por ta eksperenshando un óf otro preshon riba nan salú mental. Na boka di trabou tambe por tin faktornan ku ta afektá e salú mental negativamente, ku por ta kousa di un desbalanse mental.

Algun faktor na boka di trabou por ta ku hefe ta pone demasiado preshon riba e trahadó. Ta duna tarea ku ta fuera di e trahadó su kapasidat. No tin komunikashon optimal tampoko inklushon. Hefe ta trata malu, ta hasi mal uso di su poder i e sirkunstansha bou di kual mester laborá no ta adekua. Tur faktor ku ta pone ku e trahadó no ta sintié komodo na boka di trabou por duna stress i afektá salú mental.
Stress por keda okashoná dor di sirkunstansha di trabou óf dor di faktornan personal. Salú mental meskos ku salú físiko tin su impakto riba produktividat na trabou. Depreshon mundialmente ta un di e malesanan di salú mental ku mas ta prevalesé na boka di trabou.

Ministerio di Salubridat, Medio Ambiente i Naturalesa ta enfatisá importansha di tin un salú mental saludabel pa por ta un persona/ empleado sano. Ban kultivá un kultura di trabou ku ta prevení problema di salú mental i promové un salú mental positivo pa nos empleadonan.

Advertisements