Karta Charles Cooper – MFK: Maneho kaótiko di Presidente di Staten, Reakshon riba karta di fecha 15 di mart 2018 number 0418-1a v/17-18 di presidente di Parlamento


Karta Charles Cooper – MFK: Maneho kaótiko di Presidente di Staten, Reakshon riba karta di fecha 15 di mart 2018 number 0418-1a v/17-18 di presidente di Parlamento

Presidente di Parlamento
Sr. W. Millerson
Wilhelminaplein 4
PRESENTE

Kòrsou, 17 di aprel 2018

Tópiko: Reakshon riba karta di fecha 15 di mart 2018 number 0418-1a v/17-18 di

presidente di Parlamento

Señor Presidente,

Ku asombro Frakshon di MFK a tuma nota di reakshon di bo persona den bo karta di dia 15 di mart último, number  0418-1a v/17-18 riba mi karta di dia 11 di mart kaminda bo persona ta indiká i mi ta sita;

“Mi ta spera ku e kontenido di e karta aki lo kita e impreshon eróneo ku bo a trata na krea, esta ku mi persona deliberadamente no ta yama reunionnan pidi dor di oposishon i ta faboresé koalishon den e sentido aki”

Mi kier a indiká ku mi ta reakshoná awor, debí ku mi tabata di biahe pa trabou na Panamá i Hulanda resientemente.

Señor presidente nos frakshon ta papia di e realidat ku a bin ta tuma lugá den Parlamento bou di bo presidensia. E impreshon eróneo ku bo ta menshoná, ta bo persona mes a krea esaki i mi ke rekordá bo i refreská bo memoria ku den karta fecha di 3 di ougùstùs 2017, ku lider di frakshon di MFK, señor Schotte a manda pa bo persona bo por tuma nota ku bo persona ta privilegiá koalishon riba oposishon.

Un petishon pa reunion dor di frakshon di MFK for di dia 22 di mei 2017, ta wòrdu yama dia 8 di ougùstùs komo punto di agènda # 2, miéntras bo ta pone punto di agènda komo punto # 1 e tópiko ku a wòrdu pidi dia 1 di ougùstùs 2017 (pues un petishon di apénas 7 dia) dor di miembronan di Parlamento ku ta sostené koalishon i pa kolmo ku un punto di agènda similar ku esun di frakshon di MFK.

Ta pa e motibu aki ku den mi karta di dia 11 di mart mi a indiká ku bo persona ta kontinuá ku e praktiká ariba menshoná, esta di tene nos reunionnan atras i yama esun di  koalishon ku bo ta sosten’é promé ku esnan di nos. E prueba nan tei klaramente pa bo mes lesa, señor presidente i no lubida ku den mes un karta señor Schotte ta hasibu 4 pregunta i mi ta bai sitanan i bo kontesta ku bo a duna na kada un di e preguntanan aki;

 

  1. Kua ta e maneho ku bo persona ta i lo bai hiba pa ku petishonnan di reunion? Lo kumpli ku 14 dia manera stipula den RvO?

 

Kontesta: Mi maneho ta di kumpli kabalmente ku e Reglamentu di Ordu

   di Parlamento.

 

  1. Kua ta e krtiterionan ku bo persona ta bai tene kuenta kuné ora di fiha fecha di reunionnan? No ta asina ku petishonannan ta haña prioridat segun fecha di entrega?

 

Kontesta: Si

 

  1. Pa bo persona, tin diferensha den petishonnan hasi dor di e 3 miembro di Parlamento ku firma pa un reunion den kuadro di nan partispashon den koalishon/mayoria òf esnan ku ta forma parti di oposishon/minoria?

 

Kontesta: No

 

  1. Kua maneho bo persona ta bai hiba pa ku reunionnan yama den kuadro di urgensha, ku otro palabra, reunion ku lo tin ku tuma luga mas promé ku e 14 dianan stipulá den nos RvO?

 

Kontesta: Manera ya informá konvokashonnan di reunionnan lo

     wòrdu atendé konforme  nos kalendario di reunionnan di  

     Parlamento (“vergaderkalender”). Si tin kasonan di  

     urgensia ku tin di aber ku interes di Pais (“landsbelang”), lo

     por desviá for di e “vergaderkalender”.

 

Señor presidente aki bo por husga pa bo mes, ku ta bo persona a indiká por eskrito ku bo ta bai kumpli kabalmente ku e Reglamentu di Ordu, pero den práktika bo ta hasiendo todo lo kontrario, bo ta papia A hasi B.

E lokual ku bo ta indiká den kontesta # 4 di bo karta di dia 8 di ougùstùs 2017 ta kompletamente robes, esaki tampoko ta para den Reglamentu di Ordu, ta bo opinion esei ta i bo opinion no ta konta den e kaso aki. Bo mester ta konsistente i tenebu na lei, regla i proseduranan ku ta para den nos Reglamentu di Ordu, tin e dianan kla stipulá pa tene e reunion i abo komo presidente tin ku tenebo na bo tarea skirbi den Reglamentu di Ordu i kumpli kabalmente ku nan, manera bo mes a bisa “Thats it”, no tin ningun otro manera.

Laga nos ta sinsero sr. presidente den siman di reunion ta 3 òf 4 dia so ta reuní no mas, bo ta hasi manera ku ta tur dia den e siman ei tin reunion lokual ku no ta bèrdat. Tambe bo ta indiká ku un kantidat grandi di reunion ta ser pidi, sr. presidente ta prerogativa di kada frakshon pa pidi kuantu reunion ku nan ta deseá, bo tarea ta di skèdjel nan den e tempu ku nan wòrdu pidi.

Den bo karta tambe bo ta indiká ku mester tene kuenta ku e ministernan ku mester asistí i tambe e demas persona i òf instansianan ku esnan ku a pidi e reunion ke skucha, mi tin ku bisa ku ta p’esei bo ta haña 14 dia pa bo por skèdjel e reunionnan pidi.

Mi mester rekordá bo, ku bo persona a bisa na medionan di komunikashon ku frakshon di MFK ta pidi reunion pa stroba gobernashon. Den bo karta fecha 15 di mart bo ta kambia bo deklarashon bisando ku awor aki ku hopi reunion ta wòrdu yama, esaki no ta kuadra ku loke bo a bisa den prensa, ni tampoko ku mester tene kuenta ku otro, ta bo persona mester indiká na nan e dia ku nan mester ta na Parlamento. Un biaha mas bo mes ta mustra ku bo no ta konsistente i ta bo a krea impreshon eróneo ku bo deklarashon ku nos frakshon ta yama reunion pa stroba gobernashon, ta un kos kompletamente for di òrdu i robes di bo persona.

Tokante durashon di e reunionnan inkluso periodo pa ministernan buska informashon i sigui despues ku e reunion ta keda di skòrs pa largu tempu i ku nan ta bai keda riba di e lista di reunionnan pendiente mi tin ku informábu ku ta abo ta permití esaki sosodé si e minister pidi bo e tempu abo mester tenebu na e tempu ku e minister ta indiká.

Un otro faktor ku tambe bo a indiká ku ta okashoná tardansa den yamamentu di reunion ta e echo ku tin petishon ta wardando riba dokumentunan di gobièrnu i bo a duna komo ehèmpel e karta fecha 27 di novèmber 2017 enkuanto subimentu di prima di seguro WA ku 13.5%. Señor presidente mi ta haña esaki hopi bou di nivel di bo persona pa menshoná esaki pasombra dia lider di frakshon di MFK, señor Schotte den un karta fecha di 8 yanüari 2018 a reklamá riba di yamamentu di reunion ta te dia 22 di yanüari 2018 bo a manda un karta pidi pa dokumentunan pidi den nos karta fecha 27 di novèmber 2017 serka e minister konserní, esaki dos luna despues di nos petishon pa e reunion.

Esaki si mi ta haña kolmo de los kolmo ku bo tin e kurashi di bin bisa den bo karta ku esaki ta un di e tardansanan miéntras ta bo persona ta keda sin manda e karta pidiendo dokumentashon for di 27 di novèmber 2017. Señor presidente bo ke bisa mi pa haña informashon serka e minister mester dura 5 luna? Anto asina aki bo ke bin bisa ku ta mi persona a trata na krea un impreshon eróneo di señor presidente Miéntras echonan ta prueba ku ta bo persona ta faltando ku reglanan i prosedernan stipulá den nos Reglamentu di Ordu.

Señor presidente e karta di mi persona no mester ta sorpresa p’abo, debí ku for di yanüari bo a risibí un reklamo similar di lider di frakshon di MFK, pero bo no a hasi nada pa remediá e situashon i awe bo ta bin konta yen di kuenta dikon ku bo no a yama reunion ku, awó despues di 4 luna no tin ningun sentido pa splikashon pa hustifiká esakinan. Den e kaso aki ta kumplimentu ta konta i nos no tin nada ku yen di esküs dikon e kos no tabata por.

Ta pa di tres bes frakshon di MFK ta mustra bo ku pruebanan palpabel ku ta deliberadamente bo a skohe di privilegiá bo koalishon riba nos frakshon, nos ta bolbe reiterá ku nos reunionnan ta wòrdu pidi konforme Reglamentu di Ordu i bo mester yama e reunionnan manera ta stipulá den nos Reglamentu di Ordu i esei ta simplemente bo tareanan kual ta deskribí den artíkulo 7 di Reglamentu  di Ordu.

Ta un derechi ku nos komo miembronan di Parlamento tin i abo komo presidente no por disidí ku bo ta kita e derechi aki for di nos frakshon, strobando nos frakshon di hasi nos trabou manera pueblo ta ferwagt di nos.

Atentamente,

Na nòmber di Frakshon di MFK

Charles F. Cooper

Miembro di Parlamento (MFK)

Advertisements