REFINERIA DI KORSOU TA SKOHE IHS MARKIT KOMO EKSPERTO PA ASISTI KORSOU DEN BUSKEDA DI PARTNER PA DESAROYA NOS REFINERIA


REFINERIA DI KORSOU TA SKOHE IHS MARKIT KOMO EKSPERTO PA ASISTI KORSOU DEN BUSKEDA DI PARTNER PA DESAROYA NOS REFINERIA

Willemstad 17 di aprel 2018 – Refineria di Kòrsou despues di un proseso di evaluashon, a skohe IHS Markit komo e kompania eksperto ku lo asistí Kòrsou, den e búskeda di un partner pa desaroyá i modernisá nos refineria despues di 2019.  Refineria di Kòrsou, konforme desishon di Konseho di Minister di 30 di desèmber 2017, a inisiá na yanüari último ku e búskeda di un kompania eksperto pa asistí Kòrsou den e proseso pa yega na un partner stratégiko pa nos refineria. Despues di un evaluashon rigoroso pero efektivo, ku a inkluí tantu un evaluashon di e kapasidat i konosementu tékniko komo e proposishon komersial di e 7 kompanianan ku a partisipá den e destaho, a skohe e kompania IHS Markit komo esun mas ideal pa asistí Kòrsou den e proseso importante aki. A realisá e proseso di eskoho aki den e tempu ku a keda planifiká.  Refineria di Kòrsou, awor asistí pa IHS Markit, lo inisiá mesora ku e proseso pa yega na kandidatonan potensial pa manehá, operá i modernisá nos refineria despues di 2019.

E proseso pa yega na e eskoho di e eksperto

Na inisio di e proseso pa yega na e eksperto aki, Refineria di Kòrsou a manda puntra 15 kompania, ku reputashon di sa hasi e tipo di trabou aki, si nan tin interes pa partisipá den e destaho. Di e 15 kompanianan aki 7 kompania a kontestá ku nan lo ta interesá. Refineria di Kòrsou a manda un asina yamá Request for Proposal (RFP) pa e kompanianan i a risibí una oferta di kada un. E ofertanan mester tabata konsistí di dos parti separá, esta e parti tékniko i e oferta komersial.  Refineria di Kòrsou na promé lugá a evaluá e kapasidat i konosementu tékniko di e kompanianan i despues a hasi un evaluashon di nan oferta komersial. IHS Markit a skor mas haltu ku tur e otro kompanianan pa ámbos komponente i komo tal a keda skohé.

 

IHS Markit

IHS Markit ta un kompania ku a sirbi mas di 50.000 kompania rònt mundu. E kompania tin 80% di e kompanianan riba Fortune 500  komo su kliente, bou di kua tin 94 di e 100 kompanianan Merikano mas grandi.  IHS Markit su ofisina prinsipal ta na Londres i e kompania ta konta ku profeshonalnan trahando rònt mundu.

IHS Markit ta bon konosí ku Kòrsou. Den pasado kaba nan a sostené Refineria di Kòrsou ku konseho tokante di refineria i instalashonnan di depósito. IHS Markit na 1985 a asistí gobièrnu den e parti tékniko di e negosiashonnan pa mantené e refineria habrí. Banda di brinda sosten na Refineria di Kòrsou e kompania a yega di brinda sosten na diferente kompania den Karibe, den nan búskeda pa kumpra refinerianan den Karibe i a sostené kompanianan den nan estudio pa inventarisá modernisashon di refinerianan den region.  Por último IHS Markit a sostené kompanianan den negosiashon tokante LNG, estudio di merkado i “due diligence”.

Búskeda pa partner stratégiko mas intensivo

Awor e búskeda pa e partner stratégiko pa nos refineria ta drenta mesora den e siguiente fase, ku ta  búskeda di partnernan potensial ku ta interesá den nos refineria. Maske ku tin kandidatonan ku ta mustrando interes den nos refineria, e proseso mester ta unu diligente, transparente i ku ta pèrkurá pa Kòrsou haña e mihó partner, ku huntu ku nos por pèrkurá pa un futuro duradero di nos refineria.

E promé paso ta pa traha riba un asina yamá “High quality investor’s data package”. Esaki ta un dokumentu ekstenso ku aparte di ta duna un bista amplio di e aspektonan tékniko i finansiero di nos refineria, e mester kontené tambe p.e. e potensial di nos refineria unabes ku renob’é. Na mes momentu ta sondia tambe e interes serka interesadonan potensial den mundu. E “High quality investor’s data package” mester ta kla pa mas tardá entre ougùstùs i sèptèmber.  Lo mester kumpli ku algun tarea sekundario promé, esta:

  • Aktualisá e modèl di “cashflow” di e refineria kreá na 2015/2016 i e modèl a largo plaso di balorashon a base di e último pronóstiko a largo plaso di preis
  • Revisá minusiosamente e pronóstiko di merkado pa krudo i produkto
  • Evaluá posibel konfigurashonnan alternativo pa e refineria
  • Aktualisá e evaluashon i e estudio, ku IHS Markit a efektuá na 2015/2016, tokante di e terminal di Bullenbaai operá pa un tersera.
  • Investigá si modernisá e refineria òf (laga) traha un nobo na otro lokalidat ta e mihó desishon
  • Investigá e merkado(nan) i preis di LNG i/o gas natural
  • Investigá e “business case” di CRU (e planta di utilidat)
  • Traha un “overall business case”
  • Atendé ku aspektonan di medio ambiente, salú i seguridat
  • Kompilá i traha un “investor’s data package”

 

Lo manda e “High quality investor’s data package” pa tur e partidonan ku a demonstrá di tin interes den bira nos partner stratégiko pa manehá i operá nos refineria despues di 2019. IHS Markit mes lo asistí Refineria di Kòrsou den e proseso di identifiká organisashonnan apropiá ku ta interesá i ku ta disponé di fondonan pa por ehekutá e modernisashon(nan) nesesario i ku tin e kapasidat tékniko pa operá nos refineria, tambe e terminal di Bullenbaai i proveé gas natural òf LNG. IHS Markit lo asistí Refineria di Kòrsou tambe den elaborashon di e kontraktnan relevante.

Tur esfuerso ta dirigí pa logra ku pa mas tardá fin di aña nos lo por tin e kandidatonan ku lo sigui negoshá kuné pa yega na un akuerdo definitivo. IHS Markit lo asistí Refineria di Kòrsou tambe den elaborashon di e kontraktnan.

No opstante ku henter e proseso por lo general ta unu ku komo kolektividat nos mester atendé ku diligensia, e próksimo fase ta unu kaminda nos mester ta ainda mas konsiente di e embergadura di kualke akshon ku por influensiá persepshon di partnernan potensial i nan disponibilidat pa drenta un proseso asina elaborá di negosiashon. Refineria di Kòrsou, konsiente di e importansia di nos refineria, lo tene partidonan envolví i komunidat na altura di desaroyo di e proseso na momentunan kardinal den e trayekto.  E proseso ta unu kompliká, den un merkado petrolero dinámiko loke ta eksigí pa nos tin nanishinan den un direkshon ku e firme konvikshon ku nos por logra, basta kada un di nos duna di su parti.

 

Advertisements