Maduro & Curiel’s Bank ta publiká su sifranan pa 2017


Maduro & Curiel’s Bank ta publiká su sifranan pa 2017

Algun dato relevante tokante e aña tras di lomba di Grupo Maduro & Curiel’s Bank (MCB):

Den nos Relato Anual 2017 ku lo keda publiká, nos ta dediká atenshon na diferente inisiativa i aktividat ku ta tuma lugá riba nos islanan en konekshon ku sostenibilidat i kuido di nos planeta. Pa medio di nos Relato Anual nos ta enfatisá nos meta pa keda Bo Banko number 1 den Karibe dor di sirbi i kuida nos Klientenan i Komunidatnan ku e kompromiso di trese solushonnan inovativo i sostenibel pa medio di nos empleadonan ku ta asina dediká.

Nos resultadonan di 2017 ta mustra ku nos kapital propio, sin konta e interesnan minoritario, pa promé biaha a surpasá e marka di NAF 800 mion i un NAF 47 mion sólido, o sea 6%, a fortifik’é pa e alkansá NAF 818 mion.

Na 2017 e aktivonan total di e Grupo a krese ku mas ku NAF 450 mion (6% impreshonante) te NAF 7782 mion. E rason pa e kresementu kontinuo aki di e aktivonan ta e oumento grandi den depósitonan di kliente ku NAF 418 mion òf 7% te NAF 6691 mion.

Pa motibu di e ekonomianan yen di reto i e akontesimentunan despues di orkan Irma, e resultado neto konsolidá despues di belasting a baha konsiderablemente ku 18.9% òf NAF 24 mion te NAF 104 mion.

Manera semper ta e kaso, nos ta proveé transparensia den nos estado finansiero i ta mas ku dispuesto pa elaborá i klarifiká kualke aspekto den nos sifranan si bo ta deseá esei.

Manera nos a menshoná anteriormente, ku nos enfoke riba sostenibilidat, diferente kompania chikí pero di nifikashon grandi den área di redusí, reusá i resiklá ta wòrdu tresé dilanti den nos Reporte Anual e aña aki. Esaki ta un muestra ku hasta komunidatnan chikí por kontribuí pa hasi nos mundu un mihó lugá pa traha i biba. Huntu nos por logra esaki.

 

Chicu Capriles

19 di aprel 2018

Advertisements