Minister Marilyn Alcalá-Wallé: “Edukashon ta pinta alma na kolo, pa habri porta pa futuro.”


Minister Marilyn Alcalá-Wallé: “Edukashon ta pinta alma na kolo, pa habri porta pa futuro.”

 

WILLEMSTAD – En konekshon ku 25 aña di eksistensiá di partido PAR, a organisá resientemente un charla tokante “kalidat di edukashon komo meta pa desaroyo sostenibel na Kòrsou”.

Den e kuadro aki, Minister di Enseñansa, Siensia Kultura i Deporte, sra. Marilyn Alcalá-Wallé a duna kontenido i liña di maneho riba Edukashon di Kalidat na Kòrsou.

Durante e presentashon, sra. Alcalá-Wallé a suprayá ku tur mucha tin derechi riba desaroyo i akseso igual na enseñansa di kalidat. Gobièrnu di Kòrsou su vishon ta pa brinda edukashon di den un mundu di diversidat. Esaki ta kana segun e linea di maneho ku UNESCO a stipulá den desaroyo sostenibel di Edukashon di Kalidat (SDG 4) segun e Marko di Referensiá di Edukashon di Kalidat 2030. Den kuadro di esaki a implementá enseñansa obligatorio i pone komo méta ta pa yega na 0 drop out. Tur hende tin derechi riba kalifikashon segun nan kapasidat.

Pa mehorá kalidat di enseñansa ta imperativo pa hasi análisis di e oferta i demanda riba tereno di enseñansa. Oferta den e kaso aki ta referí na implementashon di diferente strategia, di kua ta ilustrá 3:

  1. Aktualmente gobièrnu ta hasiendo e ehersisionan nesesario pa krea i mehorá fasilidatnan di edukashon asina ku tur mucha por risibí edukashon den un ambiente sano, salú i efektivo.
  2. Ku bista riba un di métanan pa aña 2020 segun UNESCO, Gobièrnu di Kòrsou banda di duna finansiamentu di estudio, ta eksplorando posibilidat pa haña beka (scholarship) pa enseñansa avansá den region i globalmente. Di e forma aki nos muchanan por haña mas oportunidat pa amplia nan konosementu i desaroyá nan mes komo suidadadanonan di mundu.
  3. Ku bista riba aña 2030 UNESCO pero tambe gobièrnu ta buskando formanan pa oumentá e kantidat i kalidat di maestro- i dosentenan na Kòrsou.

Pa lokual ta trata demanda ta importante pa sa kiko ta e nesesidatnan di esun ku ta risibí e edukashon. Mester tene kuenta ku e.o e género i diferensia di género, e aserkamentu di género, karakter di e mucha, famia, e influensha di medio-ambiente i medionan di komunikashon, sigur den un mundu globalisando.

Finalmente Minister M. Alcalá-Wallé a klousurá ku e dicho: “Edukashon ta pinta alma na kolo, pa habri porta pa futuro.” P’esei ta importante pa huntu nos traha riba e kalidat di enseñansa i krea oportunidatnan den nos sistema di enseñansa.

Advertisements