Simulashon di situashon di krisis di Organisashon di Kalamidat a kana bon


Simulashon di situashon di krisis di Organisashon di Kalamidat a kana bon

 

Willemstad – “Kòrsou su tim di kalamidat ta bastante bon prepará pa un promé akaparashon di hende ku, akaso di un situashon di krisis, ta bin buska refugio den nos pais”. Asina Promé Minister Eugene Rhuggenaath a konstatá, despues di un simulashon ínespera di un situashon di krises, ku a tuma lugá riba djaweps dia 19 di aprel. Den e ˈdrillˈ, kaminda Promé Minister Rhuggenaath i tur organisashon ku tin di haber ku un situashon di krises, a partisipá, diferente senario di emergensia a surgi.

Tur organisashon, ku ta forma parti di Rampenbestrijdings Organisatie (RbO), a partisipá na e simulashon, sin ku nan tabata na altura adelantá. Meta tabata pa haña sa kon lihé e organisashonnan di emergensia ta reakshoná i bira aktivo ora tin un situashon real. Ni maske  sierto representante a enkortra difikultat pa por a aktivá nan hendenan i organisashon, tòg por papia di un eksito. E organisashon di e simulashon tabata den man di Direktorado di Kontrol di Riesgo i Maneho di Kalamidat, (DRR), ku ta kai bou di Minister di Asuntu General.

Rampenbestrijdingsorganisatie (RBo) ta e organisashon na Kòrsou ku ta enkargá ku e kordinashon di un krísis òf kalamidat i alabes ta sòru pa mitigá e efektonan ku esaki por tin. E RBo ta konsistí di 9 Emergency Support Functions (ESF) ku ta diferente organisashon ku ta traha huntu pa mitigá e efektonan ku un krísis òf kalamidat por tin. Na momentu ku nos papia di un kalamidat, Prome Minister Rhuggenaath ta fungi komo “opperbevelhebber”.

RBo ta hasi simulashon regularmente pa asina tene tur hende ku tin di haber ku un posibel krisis of kalamidat skèrpi. Pa e simulashon aktual a hasi uso di un situashon fiktísio di refugiadonan ku a bini di Venezuela, kual mester a haña refugio na Kòrsou. Luna pasá ta tin un simulashon, kaminda a djis tèst kon lihé por a alarmá tur hende den e organisashon den kaso di un tsunami. E simulashon ku refugiadonan aktual a bai mas leu, dor di realmente organisá akohida, transporte i registrashon, pa e hendenan ku tabata fungi komo refugiado.

Den un evaluashon di e simulashon a yega na algun punto ku mester di mehorashon i solushon. Den e simannan ku ta sigui ta bai traha riba e mehorashonnan ei i riba proposishon pa solushonnan. DRR i Gobièrnu di Kòrsou ke sigurá tur hende ku por a konstatá algu di e mobilisashon pa e simulashon, ku tabata trata di un simulashon i ku niun ora so no tabatin niun peliger pa suidadano ni pa e hendenan ku tabata envolví den e simulashon.

Advertisements