Un tráfiko mas sigur riba Ring di Schottegat i ‘Nieuwe Haven’


Un tráfiko mas sigur riba Ring di Schottegat i ‘Nieuwe Haven’

 

Willemstad – Diariamente hopi outomobilista ta hasi uso di e asina yamá ‘ring di Schottegat’ i Dominico ‘Don’ Marina Boulevard (‘Nieuwe Haven’) pa yega na diferente destinashon. Pa esaki sosodé na un manera aun mas seif, Servisio pa Obra Públiko (OW) a laga pone bòrchinan di tráfiko ku ta indiká diferente medida di tráfiko. 

 

Bòrchi riba ‘ring di Schottegat’ i “Nieuwe Haven”: 

Na diferente punto spesífiko riba ‘ring di Schottegat’ i “Nieuwe Haven”, despues di kada krusada, a laga pone 2 bòrchi (un riba otro). E bòrchi ariba ta e firkant blanku ku un firkant mas chikitu hel den dj’é. Komo ku e bòrchi ta poné despues di e krusada, e ta indiká ku bo ta riba un kaminda di preferensia pafó di área poblá. Bou di e bòrchi aki, a buta e otro bòrchi esta di velosidat máksimo di 80 kilometer pa ora.

 

Por pone e mesun bòrchi di kaminda di preferensia aki tambe den sierto areanan poblá promé ku un krusada riba un kaminda di preferensia. Esaki ta indiká ku den un área pobla ta permití pa stashoná vehíkulo riba un kaminda di preferensia aki. Pafó di área poblá, esta riba ‘ring di Schottegat’ i “Nieuwe Haven” no ta permití pa stashoná vehíkulo riba e kaminda di preferensia

Bòrchi na Seru di Domi:

Na altura di Seru di Domi a pone 2 bòrchi riba otro. E bòrchi ariba ta esun ku ta indiká ku tin un peliger ku un vehíkulo por slep riba e kaya aki. E bòrchi bou di dj’é ta konsehá e outomobilista pa kore un máksimo di 50 km pa ora pa evitá kualke aksidente, mirando ku e vehíkulo por slep.

Bòrchi na Sentro Komersial Promenade: 

Na altura di Sentro komersial Promenade a pone 2 bòrchi riba otro. Esun ariba ta indiká ku tin peaton ta krusa na e sitio ei. Pa e motibu aki a pone un bòrchi bou di esun di peaton kual ta rekomendá e outomobilista pa e kore un máksimo di 50 kilometer pa ora. E bòrchi aki ta konta pa e kaminda entre Promenade i Gomez Enterprises.

Ku e bòrchinan aki, OW ta yuda guia nos tráfiko pa esaki ta aun mas sigur.

Bòrchi di tráfiko riba ‘ring di Schottegat’ i “Nieuwe Haven”

 

Bòrchi di tráfiko na Seru di Domi

 

Bòrchi di peaton i velosidat rekomendá di 50km pa ora

Advertisements