Minister Camelia- Römer ta rekordá komunidat ku…. DIA 22 DI APREL: DIA INTERNASHONAL DI MAMA TERA    


 Minister Camelia- Römer ta rekordá komunidat ku….
DIA 22 DI APREL: DIA INTERNASHONAL DI MAMA TERA

Willemstad – Minister di Salú, Medio Ambiente i Naturalesa, Suzy Camelia- Römer ta rekordá komunidat en general ku djadumingu dia 22 di aprel tabata Dia Internashonal di Mama Tera. Riba e dia aki a duna atenshon spesial na nos medio ambiente dor di hasi uzo di e oportunidat pa konsientisá komunidat di e importansha djesaki. E dia spesial aki a keda fundá na 1970 pa Gaylord Nelson, ambientalista i senador Merikano di e tempu ei. Tur aña tin un tema diferente i e aña aki e tema ta, “Ban kaba ku polushon di plèstik”.

Nos influensha grandi riba medio ambiente ta hasi nos kulpabel p’e polushon aktual. Nos kustumbernan destruktivo den kombinashon ku preshon pa realisá desaroyo ekonómiko, ta resultá den polushon di entre otro nos laman ku kantidat grandi di plèstik. Den Pasífiko tin asta “islanan” grandi formá pa tur tipo di plèstik ta drif den laman ya pa hopi aña i ta forma peliger pa hende i bida máritimo. E problemátika di plèstik den kombinashon ku demas problemanan ambiental por trese futuro di hende i diferente otro organismo riba e tera aki na peliger. P’esei hustamente pa kibra ku e tendensia negativo aki a proklamá dia 22 di aprel komo Dia Internashonal di Mama Tera.

Aki na Kòrsou tambe nos a rekonosé e problemátika di plèstik. Den pasado Gobièrnu i supermerkadonan a hasi palabrashonnan pa para uzo di saku di plèstik pero lamentablemente no ta tur sektor a partisipá. Aktualmente Minister Camelia- Römer ta trahando riba un proyekto di lei pa abolí uzo di sakunan di plèstik den tur sektor. Pero no ta sakunan di plèstik so ta forma problema pero dòpinan di plèstik tambe. E último aki por keda asta algun shen aña den medio ambiente promé ku e degradá kaba na nada. Ta importante pa nos tur tuma akshon dor di hasi uzo di plèstik di forma konsiente, apartá esaki for di otro shushi i semper depositá esaki den bakinan spesial pa kolektá plèstik ku tin na diferente supermerkado.

Riba potrèt, sitio na St. Joris kaminda hopi plèstik mesklá ku palu ta drif mei mei di palunan di mangel.

Riba potrèt, sitio na Ascension kaminda plèstik prosedente di laman grandi ta akumulá. Ántes tabatin hopi mas plèstik na e sitio aki ku e tempu ei tabata yama “Plastic Baai”.

Riba potrèt, un isla grandi formá pa plèstik ku ta drif hopi aña kaba den laman Pasífiko.

Riba potrèt, por mira bon kla kuantu plèstik tin den kadaver di e para aki. Por rekonosé klaramente dòpinan di plèstik di bòternan di refresko.

Riba potrèt por mira e daño grandi ku djis un pida plèstik di  “six pack” ta kousa na organismonan marino.

Advertisements