Orashon djaluna 23 di aprel 2018


Orashon djaluna 23 di aprel 2018

‘Hesus a sigui bisa: ‘Mi ta sigurá boso: esun ku no drenta kurá di karné di porta, ma bula drenta di otro kaminda, ta un ladron i bandidu. Ma esun ku ta drenta di porta, ta e wardadó di karné. Esun na porta ta habri p’e drenta, i e karnénan ta rekonosé su stèm. E ta yama su karnénan na nan nòmber i ta guia nan bai pafó di kurá. Ora e saka nan tur, e ta kana nan dilanti i nan ta siguiÉ, pasobra nan ta rekonosé su stèm. Nunka nan lo no sigui un hende straño; sino nan ta kore p’e, pasobra nan no konosé stèm di hende straño.’ Hesus a konta nan e parábola akí, ma nan no a komprondé kiko E tabata ke men. Hesus a sigui bisa: ‘Mi ta sigurá boso: Ami ta e porta pa e karnénan. Tur ku a bini promé ku Mi, tabata ladron i bandidu i e karnénan no a tende di nan. Ami ta e porta; ken ku drenta paden via Ami, lo haña salbashon; lo e drenta paden i ora e sali, e ta haña kunuku di yerba bèrdè. Un ladron no ta bin hasi nada otro ku hòrta, mata i destruí. Ami a bini pa duna bida, bida na abundansia. ‘ Huan 10:1-10

 

Advertisements