Resultado di subasta di arte ART X Curaçao Lions Club ta entregá 30 mil florin na RMHC


Resultado di subasta di arte ART X

Curaçao Lions Club ta entregá 30 mil florin na RMHC

 

Willemstad – Resientemente Curaçao Lions Club a hasi entrega di un check di

NAf. 30.000,- na Ronald McDonald House Charities (RMHC) kual tabata e resultado di e tremendo subasta di arte ku a tuma lugá dia 17 di mart ultimo, ART X.

Durante e subasta aki mas di 25 obranan/eksperenshanan di arte (di artistanan lokal) a ser bendí. Ku e resultado final, Curaçao Lions Club a hasi un donashon generoso di NAf. 30.000,- na RMHC komo e benefisiario prinsipal di e evento aki.

Ku e donashon aki Ronald McDonald House Charities por sigui ku e bunita programa “Medical treatment abroad” kual ta enserá ku mayornan ku mester kompaña nan yu pa un tratamentu den eksterior por hası esaki. Normalmente, seguro mediko ta kubri gastu di 1 mayor. Ku e programa aki di RMHC por duna alivio na e famia pa nan no mester ta muchu tempu separá for di otro. E yudansa aki por ta den forma di kumpra ticket, paspoort, paña, etc.

RMHC ta trahando duru riba fondonan pa nan por muda bai HNO, kual ta pone ku algun otro programa tin menos presupuesto. Ku e donashon di Curaçao Lions Club e programa di “Medical Treatment Abroad” por kontinuá pa sigur dos aña mas.

Ku e resultado final aki, Curaçao Lions Club ke yama danki na tur persona i instansia ku a kumpra arte durante di e subasta di ART X, tur artista ku a partisipá ku nan bunita piesanan di arte i Prome Minister di Kòrsou sr. Eugene Rhuggenaath, sra. Annouschka Cova, presidente di CIFA i sr. Luigi Virginia partner di HBN Law, ku a kolaborá ku e artista Carel Rink pa traha tres Goatchi úniko pa e evento aki.

Riba potrèt: Momento di entrega di e check di NAf. 30.000,- na RMHC.

Advertisements