Frakshon di PAR ta bai traha riba importansia di fortifiká núkleo di famia


Frakshon di PAR ta bai traha riba importansia di fortifiká núkleo di famia

 Dia di 15 di mei ta dia internashonal di Famia. Den kuadro di esaki Parlamentario Pauletta a sinta djaluna último ku un grupo di institutonan sosial pa deliberá riba loke ku ya kaba ta tumando luga i huntu yega na  intervenshonnan pa duna sosten na nos núkleo familiar.

E núkleo familiar ta e promé enkargá ku formashon di e ser humano. Den literatura ta papia di un famia ideal konsistiendo di dos mayor i dos mucha.  Nos por konstatá ku na  Kòrsou esaki tiki tiki ta kambiando. Kantidat. A base di diferente investigashon resien ta konosí ku tin un grupo kresiente di mayor soltero na Kòrsou . Esta mama òf tata ku nan yunan. I tambe famia nan ekstendí ta birando e norma, esta den un kas diferente adulto ku yunan huntu. Segun e investigashon di SER tokante suèldu mínimo ta hustamente e gruponan aki ta e gruponan mas sensibel pa kai den problemanan finansiero.

Profeshonalnan riba tereno soshal ta anunsiá ku pa falta di un di mayornan, e  identidat, outestima i sentido di pertenensia di e hóben ta keda afektá negativamente. Pero tambe falta di espasio personalta strobá e desaroyo di e hòben.

Esaki huntu ku hopi otro punto a motivá e frakshon di PAR pa enfoká riba nesesidatnan di nos famianan. Durante e próksimo simannan, nos lo bai dediká diferente akshon pa ku nos famianan.  Por pensa entre otro riba revishon di leinan i konsientisashon di e importansia di un bida familiar salú i positivo.

Nos ke pa Kòrsou ta kompletamente integrá den e pensamentu ku nos tin ku salvaguardá nos núkleo familiar. I ku solamente dor di trabounan enkonhunto nos logra protehá nos famianan.

Advertisements