Frakshon di PAR ta pidi reunion di komishon sentral urgente riba e situashon alarmante di nos kayanan.


Presidente di Parlamento di Kòrsou

Sr. W. Millerson

Wilhelminaplein 4

Presente

 

Kòrsou, 23 di aprel 2018

 

Tópiko:  petishon komishon sentral urgente riba situashon preokupante di nos kayanan.

 

Señor Presidente,

Pa medio di e karta aki frakshon di PAR ta aserká bo persona konforme artíkulo 33 di nos Reglamento di Òrdu pa konvoká un reunion di komishon sentral urgente ku Minister di Tráfiko, Transporte i Planifikashon Urbano, sra. Zita Jesus-Leito, pa trata e situashon preokupante i alarmante di nos kamindanan ku buraku.

No ta un sekreto ku e situashon di nos kayanan pa algun aña kaba no ta hañando e atenshon ni mantenshon nesesario ku e konsekuensia ku awe nos tur ta sufri di esaki.

Aktualmente hopi di nos kayanan prinsipal i kayanan den barionan ta afektá ku un òf mas buraku hundu i grandi.

Esaki ta stroba e fluho di transporte i un tráfiko sigur pa motibu ku e shofùr  tin ku hasi maniobra straño ku por kousa aksidente. Tambe outomobilistanan ta tuma otro ruta, hopi biaha mas largu, òf ta pasa den verboden pa evitá  buraku, chèns di kibra tire òf algu otro na e outo.

Pa Parlamento ta sumamente importante pa tende di Gobièrnu su intenshon, interes, maneho i fondonan disponibel pa atendé ku e problemátika aki.

Kua trayekto ta bai kana pa yega na un solushon a korto i largo plaso esaki segun e gravedat di estado di nos kayanan.

Huntu ku Minister Jesus-Leito frakshon di PAR ta solisitá presensia di Minister di Finansa, sr. Kenneth Gijsbertha, pa asina Parlamento por tin bista riba paragraf i ehekushon finansiero ku esaki ta rekerí.

Atentamente,

Jeser El Ayoubi      Gisette Seferina      Ana Maria Pauletta      Curtley Obispo      Stephen Walroud

Parlamentario        Parlamentario        Parlamentario                Parlamentario      Parlamentario

Advertisements