EKSITOSO MARSHE DI GRATITUT na  SENTRO DI BARIO SOUAX


EKSITOSO MARSHE DI GRATITUT na  SENTRO DI BARIO SOUAX

Relashoná ku selebrashon di su 20 aña di eksistensia Fundashon Pro Souax, komo muestra di gratitut na habitantenan di Souax en partikular i públiko en general ku durante 20 aña a sostené su trabou pa bario, a organisá ayera 23 di aprel, un grandioso “MARSHE DI GRATITUT” pa habitantenan di Souax, Gato, Zegu, Ser’i Kandela i besindario.
Durante e marshe personanan interesá por a pasa i skohe grátis artíkulonan di uzo personal i / òf di kas ku nan tin nesesidat di dje. Un públiko grandi tabata presente for di mainta trempan na Sentro di bario Souax pa hasi uzo di e oportunidat úniko aki. Apertura tabata na enkargo di sr. Charles Cooper kende ta invitado di honor pa e diferente aktividatnan ku Fundashon Pro Souax ta organisá entre 23 i 29 di aprel en konekshon ku selebrashon di su di 20 aniversario.
Pa apertura di e “Marshe di Gratitut”, tabatin tambe presente e chikitinnan di Krèsh “Sentro Pre Eskolar Lila”. Na e okashon aki tur e chikitinnan di e kresh a risibí di Fundashon Pro Souax un pakete di buki pa lesa i tambe e foyeto “Di kon lesamentu ta importante” pa nan mayornan por tuma nota di dje. Direktiva di Fundashon Pro Souax i Sentro di bario Souax ta yama danki na tur persona, instansia i organisashon ku a duna artíkulo i hasi “Marshe di Gratitut” un eksito grandi. Un danki spesial ta bai na e tim di boluntarionan ku tantu promé komo durante Marshe di gratitut a pone man na obra pa e aktividat kana nèchi.

Riba e potrètnan públiko skogiendo nan artíkulonan grátis durante “Marshe di gratitut” na Sentro di bario Souax. Momentu ku e chikitinnan den presensia di presidente di Fundashon Pro Souax sr. Junny Sluis ta risibí nan sèt di buki for di man di sr. Charles Cooper.

Advertisements