Spich 80 aña Demokrasia Parlamentario


Willemstad – Durante e reunion Solèm, den kuadro di selebrashon di 80 aña Demokrasia Parlamentario, ku a tuma lugá djarason 25 di aprel último, señora Elsa Rozendal, lider di frakshon di partido MAN, a kompartí e siguiente spich ku kolega parlamentarionan, invitadonan i pueblo di Kòrsou.

Awe nos ta para ketu na 80 aña demokrasia parlamentario i tambe na e echo ku 70 aña pasá damanan balente, mihó konosí komo “Damanan di Djarason” a hiba e lucha pa logra derecho di voto general na Kòrsou.

Mi ta kontentu ku nos ta biba den un pais liber kaminda nos tur tin un bos i ku ta tene kuenta ku bos di e minoria. Un pais kaminda ta e pueblo, mediante di su voto, ta skohe ken por respresenté den e parlamentu aki. Durante e último 80 añanan di nos Demokrasia parlamentario, partido MAN a sa durante  47 aña largu defendé i lucha pa nos pueblo i pa mantené nos sistema demokrátiko. Nos ta felisitá hinter pueblo di Kòrsou ku 80 aña di demokrasia parlamentario i ta pidi boso pa meskos ku nos, semper defendé nos demokrasia.

Den preparashon pa e reunion solèm aki nos frakshon a bin ta analisá si ku hopi prekupashon desaroyonan ku por peligrá nos sistema demokrátiko.

Nos a bin ta tuma nota ku riba nivel mundial desaroyo teknológiko ta avansando mas rápido ku desaroyo di nos konsenshi humano i aki na Kòrsou, esaki no ta un eksepshon. Desaroyo teknologiko ta algu ku si e keda usá bon i na bienestar di e ser humano, e tin benefisio grandi pa henter nos komunidat. Pero na momentu ku esaki keda usá kontra di e ser humano, esaki por resultá desastroso. Durante e último 80 añanan aki, nos demokrasia a konosé su “ups and downs” pero semper nos a logra mantené trankilidat i stabilidat.

Komunikashon ku pueblo, tabata bai primordialmente pa medio di su polítikonan i media. Polítikonan mester a kana bario, bishitá votadónan pa por sa kiko ta biba serka nan. Den mayoria kaso, Pueblo tabata dependé di solamente su polítikonan pa sa kiko tabata pasando den gobernashon. Informashon tabata yega lat òf no tabata yega mes. Pa gran parti di e 80 añanan ku a pasa no tabata tin masha medionan disponibel pa pueblo por a ekspresá su opinion públikamente. Awendia desaroyonan teknológiko mediante retnan sosial a hasi posibel ku informashon ta yega serka nos pueblo na un manera instantaneo i mas frekuente. Nos pueblo tin muchu mas tantu informashon na su disposishon.

Tambe mediante e mesun retnan sosial i tambe e diferente “talkshownan” nos komunidat por bosiferá su opinion na un manera muchu mas fásil i direkto. Tur esaki ta un desaroyo positivo debí ku nos pueblo ta muchu mas mihó informá ku den pasado. Pero meskos ku diferente otro aspektonan esaki tambe tin su parti menos positivo pa adelanto di nos pais. Na promé luga kualke persona por pone lokual ku e ta deseá sin niun skrutinio riba nos retnan sosial i laga aparesé ku esaki ta bèrdat, e asina yama “fake news”.  Dor di distribushon rápido di informashon riba nos retnan sosial, un grupo grandi di nos pueblo lo por aksesá e informashon robes aki i ta tuma hopi tempu i energia pa kontradisí e loke a keda tresé dilanti pa trese trankilidat bèk.

Tambe e mesun retnan sosial aki por i ta keda usá pa insultá i falta rèspèt pa otronan. Algu ku den un komunidat desente nos no ke tin. Pa nos demokrasia, desaroyonan teknologiko i retnan sosial tin su retonan i nos komo parlamentarionan mester sa kon pa atendé ku nan. Si nos no logra atendé ku e desaroyonan aki na un forma efektivo, nos demokrasia sigur ta kore peliger.

Nos ta gobernando den un periodo ku informashon no solamente ta yega nos pueblo di un forma instantaneo sino tambe ta yega informashon inkorekto. Pa salbarguardiá nos demokrasia den e era di desaroyonan teknológiko i retnan sosial aki ta imperativo pa nos tur traha huntu na alsa e nivel di konfiansa di nos pueblo den polítika. Ta imperativo pa nos hasi uso di teknologia mediante tanto retnan sosial komo esnan tradishonal pa komuniká mas intensivo ku nos pueblo. Di no menos importansia tambe ta ku nos komo lidernan di e komunidat aki mester traha huntu pa alsa e nivel di konsenshi humano di nos pueblo.Tambe nos mester kuminsá pensa kon nos mester bai atendé ku esnan ku ta hasi mal uso di retnan sosial pa engañá i brua nos pueblo. Nos no por para desaroyo teknológiko i nos no tin ku ni pensa pa hasi esaki tampoko, pero loke si nos por hasi, ta forma nos hendenan i hisa nan nivel di konsenshi humano. Nos ta na tempu ainda.

Ban traha huntu pa protehá nos demokrasia i ku aki 80 aña nos yu i nietonan por ta orguyoso di nan grandinan.

Advertisements