Diskurso di Minister President Eugene Rhuggenaath na e Reunion Solèm na okashon di 80 aña di demokrasia parlamentario.


Diskurso di Minister President Eugene Rhuggenaath na e Reunion Solèm na okashon di 80 aña di demokrasia parlamentario.

 

 

80 Aña pasá nos a duna inisio na un struktura pa nos demokrasia dor di instituí un organo representativo ku ta nos parlamento. For di e momentu ei nos a drenta e era di un demokrasia parlamentario. Esaki tabata kulminashon di un lucha di basta aña pa por duna nos hendenan e derechi di skohe nan representantenan, un lucha ku a sigui despues di 1938 pa ampliá esaki pa hinter poblashon kualke sea nan religion, nivel di studio, sekso, etc. Asina 70 aña pasá nos a ekstendé 70 aña pasá derecho di voto pa hende muhé na Kòrsou.

Na okashon di 80 aña sigur ta un momentu solèm di konmemorashon, un momentu pa rekòrdá i reflehá, manera varios oradornan a hasi promé ku mi, riba tur lider ku a hiba e lucha aki — nan nòmbernan ta grabá den historia—  i riba tur lokual nos a siña den ultimo 80 añanan.

Alabes pa klousurá mi kier hasi uso di e momentu awe, pa nos usa e reflekshonnan aki tambe pa wak dilanti: kon nos ta bai duna kontenido na nos demokrasia den próksimo 80 añanan?

Mi ta pensa riba mi yu muhé di 12 aña ku aki algun aña mester bai vota: kiko mi tin ku spliké di e importansia di konmemorá 80 aña demokrasia parlamentario? Kiko mi mester siñ’é di e importansia i nifikashon di nos demokrasia en general?

Nifikashon di demokrasia ta bai mas leu ku nos sistema parlamentario, e ta mará tambe na kua ta e derechinan fundamental di kada suidadano ku ta biba na Kòrsou, p’esei nos por papia tambe di un estado di derecho demokrátiko. Sin e derechinan fundamental aki garantisá den un estado di derecho demokrátiko —  libertat pa ekspresá nos mes, libertat pa skohé, libertat pa reuní, derechi pa ser husgá den un korte independiente — kualke demokrasia ta na peliger.

Ta di konmemorá ku, durante 80 aña demokrasia parlamentario, nos tabatin e libertat di skohe ken ta goberná nos. Ta e suidadano hasiendo uso di su bos i su eskoho, su derecho a duna forma na nos demokrasia i e direkshon di e pais aki. Partidonan politíko ta purba influensiá e votado,

pero al final ta e votado ku hasi uso di su derecho ta skohe.

Ta di konmemorá ku nos por a hasi uso di e libertat aki sin ku mester tabatin konflikto òf peliger pa bida i ku tabatin espasio pa kada hende su propio responsabilidat kon e ta hasi uso e derecho aki.

Partidonan politiko por tabatin kampañanan fuerte i posishonnan diferente. Pero netamente esei tambe ta na esensia di un demokrasia, e derecho di por pensa i skohe diferente. Akinan mi ta usa konsientemente diferensia, paso e no ta igual na divishon, manera hopi biaha sa enfatisá.

Netamente esei a hasi nos demokrasia riku, ku nos ta honra e derechonan di e minoria.  Den nos parlamento, partidonan ku ta forma un mayoria ta goberná, pero e grupo di representante minoria tei i ta partisipá aktivamente ku tur derecho di parlamentarionan, inkluso e derecho di traha lei i tuma desishon.

Tur esaki ta di konmemorá i selebrá.

Pero tambe mi ta kere ku pa hopi suidadano tabatin momentu ku nos por a tuma e derechinan pa lokual nan ta, sin para ketu na e balor ku nan tin den nos bida diario. I e responsabilidat ku nos ta karga ora nos ta hasi uso di nos libertat pa skohe nos representantenan.

Mi ta pensa riba un hues merikano ku a yega di eskpresá: “Tin ora mi ta puntra mi mes si nos no ta buta muchu fe den institushonnan, leinan, korte. Si demokrasia ta e libertat di kada persona pa skohe ken ta representá nan, balor di e libertat ei mester biba den kada persona. Si nos komo suidadano no balorá nos libertatnan den demokrasia, niun institushon, niun lei, niun korte no por skapa nos.”

Pues loke mi ke kòrda e suidadano, e votadó di awe i esun di mañan ku lo sigui duna kontenido na nos demokrasia den futuro, manera mi yu, ta esakinan:

Ta na nos pa duna balor i realse na nos demokrasia, pa e ta di pueblo, ku pueblo i pa pueblo. Esei ta responsabilidat di kada un di nos komo suidadano, no solamente di nos polítikonan. Ta na nos pa sòru tambe ku nos demokrasia ta krese ku nos i ku nos ta salbaguardiá e balanse nesesario pa mantené e derechi i libertatnan pa un i tur por sinti nan representá den nos pais.

Alabes pa nos politikonan un rekordatorio:

Laga nos no konfundí e dinámika politiko ku por ta poko fuerte de bes en kuando ku e funshonamentu di nos demokrasia. Den nos afan pa nos trese nos vishon polítiko dilanti i logra nos metanan, laga nos pensa si, si esaki ta yuda fortifiká  òf kibra konfiansa den nos demokrasia.

Si mi puntra mi yu, su pensamentu riba demokrasia, kiko den su persepshon (su imaginashon) lo e kier mira den nos sosiedat demokrátiko, esei lo mester kuadrá ku e lokual ku e ta opservá òf eksperensiá den arena politiko diariamente. Laga nos sigui korda otro di esei tur dia di nobo.

Ban karga nos demokrasia ku honor pa e sirbi interes di grandi di chikí, den presente i pa futuro. Pa demokrasia sigui floresé, pa demokrasia keda bibu.

Advertisements