Orashon djaweps 26 di aprel 2018


Orashon djaweps 26 di aprel 2018

‘Pablo i su kompañeronan a nabegá sali for di Pafos i a bai Perge na kosta firme. Perge tabata keda na teritorio di Pamfilia. Huan Marko a bai laga nan i regresá Herusalèm. E otronan a bai for di Perge i yega Antiokia na Pisidia. Riba dia di sabat nan a bai snoa i kai sinta. Despues di lektura for di Lei di Moises i e profetanan, esnan ku tabata dirigí snoa a manda bisa nan: ‘Rumannan, si boso tin algu pa kompartí ku e pueblo, papia numa.’ Pablo a lanta para, hasi seña ku su man i bisa: ‘Israelitanan i boso ku no ta hudiu ku ta adorá Dios, skucha. Dios di pueblo di Israel a skohe nos antepasadonan; El a hasi nan un pueblo grandi miéntras nan tabata strañero ainda na Egipto. Despues El a saka nan for Egipto ku man poderoso i soportá nan kuarenta aña den desierto. El a destruí shete nashon na tera di Kanaan i laga Israel haña nan tera komo propiedat. Tur esaki a tuma lugá durante mas o ménos 450 aña. Despues El a duna nan hues te tempu di profeta Samuel. , E ora ei nan a pidi pa un rei, i Dios a duna nan Saulo, yu di Kish, di tribu di Benhamin, ku a keda rei kuarenta aña largu. Despues di a kita Saulo, El a pone David komo nan rei. Esaki ta loke Dios a testiguá na fabor di David: “Mi a haña David, yu di Ishai. E ta un hòmber na mi agrado, un ku lo ehekutá tur loke Ami ke.” Ta for di desendensia di e hòmber akí Dios a hasi Hesus salbador di Israel, di akuerdo ku su promesa. Promé ku binida di Hesus, Huan a prediká ku henter e pueblo di Israel mester kombertí i batisá. Ora Huan tabata yega na final di su mishon, el a bisa e hendenan: “Ami no ta esun ku boso ta kere mi ta. Nò, despues di mi ta bini esun ku mi no ta sirbi ni pa bùk kita su sandalia.” ‘ Echonan 13:13-25

 

Advertisements