Aqualectra ta start ku trabounan di konstrukshon pa ekspanshon di e planta di koriente na Dokweg II. Minister dr.Steven Martina, di Energia a hasi e akto di ponementu di piedra konmemorativo


Aqualectra ta start ku trabounan di konstrukshon pa ekspanshon di e planta di koriente na Dokweg II. Minister dr.Steven Martina, di Energia a hasi e akto di ponementu di piedra konmemorativo

___________________________________________________
Willemstad : Awe a tuma lugá e seremonia ofisial ku Minister Dr. Steven Martina enkargá ku Energia, huntu ku nos Direktor sr. Darick Jonis, Minister Zita Hesus Leito i direktor di  CIBC sr Pim van den Burg a hasi e akto inisial pa ekspanshon di planta di koriente na e tereno na Dokweg. Ku e akto aki, ta marka inisio di konstrukshon di ekspanshon di e planta di koriente na Dokweg II A , establesiendo e planta di Dokweg IIB.
Tumando nota di e kresementu di demanda i uso di koriente ku ta nominal for di 2015, Aqualectra semper ta laga hasi un análisis di tantu e kresementu di demanda, e orígen di e kresementu di uso pero tambe kiko e proyekshon di e demanda di koriente pa futuro ta. Konklushon di e estudio aki ta ku debí kresementu di e demanda di koriente último tempu, mester amplia e kapasidat di koriente na e planta na Dokweg. Esaki pa un kapasidat di generashon fiho, aparte di ku ta ampliando e kantidat di energia renovabel for di bientu i solo den nos meks di produkshon.
Na luna di òktober 2017, Aqualectra a firma un kontrato ku e kompania di Wärstilä pa e ekspanshon di e planta di produkshon di koriente, Dokweg II. Gastu total di e proyekto ta aproksimádamente 71 mion.
E preparashonnan pa e proyekto a start pa algun luna kaba manera entre otro e preparashon di e tereno pa konstrukshon i awor ta asina leu pa start ku e kontrukshon di e planta mes. E kontrukshon ta konsistí di un edifisio pa ubiká e mashinnan disel i generator di koriente, boiler i tankinan di kombustibel i awa  i tambe diferente otro makinaria rekerí.
Ta spera ku pa luna yanüari 2019 ta kuminsá hasi e tèstnan nesesario i pa fin di febrüari 2019, e planta di disel lo ta kla ku un kapasidat di 39 MW adishonal pa un total di 74 MW na e planta di Dokweg II. Ku e ekspanshon aki, Aqualectra su kapasidat total pa generá koriente for di kombustibel fossil ta bira mas o ménos 160 MW.
Aktualmente Kòrsou ta registrá diariamente un demanda di mas haltu pa dia di mas o ménos 125 MW pa 130 MW.  Banda di e sentral di disel na Dokweg, tambe e sentralnan di Mundo Nobo, Sentral di Disel na Isla, planta di BOO i e parkenan di mulina di bientu na Tera Kòrá i Playa Kanoa ku ta forma parti di e régimen di produkshon di elektrisidat .
Wärstila ta e kontratista prinsipal, ku ta bai traha ku kontratistanan lokal p’asina instalá tur e makinarianan. Durante konstrukshon di e planta lo tin un promedio di aproksimádamente 100 trahadó lokal pa un periodo di alrededor di 9 luna. Den sierto periodo lo por tin hasta entre 125 pa 135 hende lokal trahando riba e proyekto aki.
Informashon Tékniko di e “Diesel Power Station:
• Heru di beton    195,000 kg
• Kontruskshon di heru    300,000 kg
• Kabel                  25,000 m
• Pipa                     48.000 m
• Trabou di lasmentu     3,500 pc
• Generator       550 Ton (4 )
Gerensia di Aqualectra tin e konfiansa ku e ekspanshon di e sentral di disel aki na Dokweg, nos empresa di utilidat a pone e siguiente paso pa por kumpli ku e demanda di elektrisidat muchu mas mihó i di e forma aki tambe kontribuí na un desaroyo konstante di nos komunidat den tur sentido.
Aqualectra di e forma aki ta sigui inverti p’abo
Advertisements