KOMUNIKADO DI KUERPO POLISIAL KÒRSOU Detenshon relashoná ku ladronisia ku violensia.


KOMUNIKADO DI KUERPO POLISIAL KÒRSOU
183 / 2018
26 aprel 2018

Detenshon relashoná ku ladronisia ku violensia.

Departamentu di Komunikashon i Prevenshon

KUERPO POLISIAL KÒRSOU SIRBI I PROTEHÁ

Djaweps 26 di aprel 2018, alrededor di 09.47 or di mainta, Sentral di Polis a risibí notifikashon di un kaso di ladronisia ku violensia ku a tuma lugá na un establesimentu den área di Pannekoek. Un ratu despues sentral ta haña otro notifikashon di un kaso di ladronisia ku violensia den área di Tera Kòrá i ku e sospechosonan ta den un Kia Rio koló maron direkshon di rotònde di Zegu. Deskripshon di e sospechosonan ta kuadra ku esun di e sospechosonan ku un ratu promé a kometé e ladronisia ku violensia na e establesimentu den área di Pannekoek. Unidatnan polisial a bai den direkshon di rotònde di Zegu i a nota ku un outo koló maron na momentu ku nan a mira e unidat polisial, a bira bèk i drenta un hanchi den área di Souax. Polis a bai tras di e vehíkulo i dado momentu e sospechosonan a para esaki i baha hui na pia. Durante un investigashon den área di Souax polis a señala dos hòmber ku ta kuadra ku deskripshon di e sospechosonan ariba menshoná. Na e sitio polis a detené e hòmbernan;
 J.R.C.H. di 40 aña di edat;
 S.M.E.V.U. di 39 aña di edat, ámbos nasé na Kòrsou, komo sospechoso di e kasonan
di ladronisia ku violensia ariba menshoná. Den e outo –ku un anochi promé a wordu hòrtá- polis a haña i konfiská artikulonan prosedente di e dos ladronisia ku violensia ariba menshoná.
A presentá e sospechosonan dilanti un Fiskal ouksiliar ku a ordená nan enkarselamentu pendiente di mas investigashon.

Advertisements