MINISTER DI DESAROYO EKONÓMIKO TA ORGANISÁ DIALOGO DEMOKRATIKO TOKANTE FUTURO DI SHA CAPRILESKADE


MINISTER DI DESAROYO EKONÓMIKO TA ORGANISÁ
DIALOGO DEMOKRATIKO TOKANTE FUTURO DI SHA CAPRILESKADE

WILLEMSTAD- Minister di Desaroyo Ekonómiko Steven Martina ta anunsiá ku dia 31 di mei 2018 , lo tin un Diálogo Demokratiko tokante e futuro di Sha Caprileskade. Pa médio di e Diálogo Demokratiko lo haña un liña pa kana pa yega na un desishon konkreto pa termino largu. MEO huntu ku UNDP ta organisá e Dialogo Demokratiko aki ku e meta pa logra un proseso inklusivo, balansá i un direkshon ku gran parti di pueblo por biba kune. E Diálogo Demokratiko lo tuma luga den sentro di nos siudat, riba Plasa Jojo Correa, di 18:00 pa 21:00 di anochi.

Despues ku Presidente Venezolano Nicolas Maduro a sera frontera pa Kòrsou, Boneiru i Aruba dia 6 di yanuari 2018 i nos a haña nos ta buska alternativa pa yena e bashí ku a keda riba merkado prinsipalmente na Sha Caprileskade, Gobièrnu a tuma e desishon inmediato pa desmantelá Sha Caprileskade, limpia e area i pone toonbank i dak nobo pa asina duna oportunidat na nos propio hendenan pa bende nan produktonan, entre otro fruta, berdura i artesania. Gobiernu a tuma e desishon aki komo un solushon pa termino kortiku i lo a bai traha riba un solushon struktural pa termino largu. Pa por yega na e solushon riba termino largu nos tabatin mester di mas klaridat riba kon e relashon ku Venezuela ta bai desaroyá.

Dia 7 di aprel 2018 Presidente Maduro a bolbe habri fronteranan pa produktonan i buelonan for di Venezuela. E momentu pa traha riba e solushon struktural, esta pa termino largu a yega i Minister ke hasi uso di e instrumento di Dialogo Demokratiko pa enbolbi komunidat den e diskushon i e proseso pa yega na e desishon.

E proseso di Dialogo Demokratiko ta un proseso partisipativo i di transformashon i ekspreshon kaminda tur partisipante ta haña oportunidat pa duna nan opinion, punto di bista i preokupashon. Na final ta skohe kua ta e desishon i esun ku mayoria vota pe ta bira e resultado di e Dialogo Demokratiko. E intenshon ta pa yega na un of mas akshon ku por duna Gobiernu un direkshon.

E Dialogo Demokratiko ta un instrumento ku Nashonan Uni pa medio di UNDP ta husa den paisnan kaminda tin konflikto i kaminda tin ku yega na pas. Serka nos e ta keda utilisá komo un instrumento partisipativo i inklusivo sin konflikto, balansá i konkreto. Na 2012 MEO, pa medio di UNDP a inisia e proseso di Dialogo Demokratiko i awe e ta un instrumento hopi utilisá pa inbolukrá pueblo of gremionan den diskushonan sano i dirigí riba resultado pa por tuma desishon.

Via medionan sosial i esnan tradishonal nos lo mantene nos pueblo informá di e preparashonan i ta organisá un anochi di informashon pa splika e proseso i pa tur ku ke sa mas di Dialogo Demokratiko por partisipa fysikamente of virtualmente i registrá pa partisipá na e Dialogo Demokratiko tokante futuro di Sha Caprileskade dia 31 di mei 2018 18:00 di atardi na Plasa Jojo Correa.

Advertisements