Investigashon sientífiko di Universidat di Amsterdam pa sigui alumnonan di SKAIH Pre-Universitario ta kai den bon tera serka mayornan.


Investigashon sientífiko di Universidat di Amsterdam pa sigui alumnonan di SKAIH Pre-Universitario ta kai den bon tera serka mayornan.

 

Willemstad, 5 di Mei 2018

 

Resientemente Fundashon Skol Humanista Na Papiamentu a organisá un anochi di informashon pa mayornan i alumnonan ku ke hasi e eskoho pa bai SKAIH-Pre-Universitario HAVO/VWO komo nan skol avansá p’e aña eskolar nobo 2018-2019.

Aki e sikólogo di skol Nihayra Leona a duna splikashon amplio di e importansha di e investigashon sientífiko ku e lo bai realisá pa Universidat di Amsterdam bou di guia di professor De Graaff di Universidat di Utrecht.

Konkretamente lo start den e kuadro aki ku un investigashon ku ta kubri e komienso di e trayekto di enseñansa bilingual (papiamentu-ingles) i lo sigui den e añanan ku ta bini.

E meta ta pa haña sa kon e dominio lingwístiko di e alumnonan ta na kuminsamentu di nan karera eskolar sekundario. Despues di e prome aña lo ripiti e tèst di siguimentu ku ta pèrmití e skol haña informashon bálido pa kaminda ta nesesario, mehorá i ahustá e programa di idioma pa asina garantisá ku ta alkansá e ophetivonan di Skaih Pre-Universitario. Lo midi varios aspekto importante relashoná ku eskohó di un skol bilingual i lo midi e nivel di konosementu i komprendimentu di e idiomanan papiamentu, ingles i ulandes.

E mayornan, di kual diferente kompaña pa nan yu a hasi tur pregunta relevante pa asina por bai di akuerdo ku e investigashon. Esaki ta konforme normanan di étika i prosedura di  investigashon sientífiko ku universidatnan ta eksigui. E investigashon lo tuma lugá pa promé biaha den luna di mei. Fuera di alumnonan ku ta skohe pa SKAIH Pre-Universitario bilingual papiamentu i ingles lo inkluí den e investigashon aki tambe amigu di e alumnonan aki (ku outorisashon di nan mayoran) ku ta sigui HAVO/VWO tradishonal komo grupo di kòntròl. Esaki pa por hasi e komparashon.

SKAIH Pre-Universitario ta hasi un yamada na mayornan ku pa un of otro motibu no a haña invitashon pa e  reunion di informashon ku a tuma lugá dia 26 di aprel 2018 pa tuma kontakto telefóniko of manda un mail. Telefòn: 8880246  E-mail  skolhumanista@outlook.com

E eportahe fotográfiko siguiente ta duna un bista di e enkuentro ku mayornan di dia 26 di aprel último i e dokumentashon ku nos ta manda athunto ta duna un bista mas amplio di e enfoke di e investigashon.

Advertisements