Selikor ta duna inisio na luna di salú


Selikor ta duna inisio na luna di salú

Pa e próksimo añanan Selikor a pone komo un di su metanan pa invertí den salú di su trahadónan. E akshon prinsipal ta pa konsientisá e trahadónan pa nan tin e konosementu i e aktitut pa hiba un estilo di bida mas saludabel, teniendo kuenta ku nan mes i nan medioambiente. Selikor ta hasi esaki pa yuda prevení malesa bou di trahadónan, krea un kultura di motivashon personal i pa optimalisá produktividat na trabou.

Pa logra e metanan akí ku ta stipulá den e plan di maneho di personal, Selikor a duna inisio na e programa di konsientisá i prepará e personal pa biba un bida balansá i salú. Esaki ta un trayekto ku lo bai konosé diferente fase riba un base kontinuo. Pa kuminsá, durante henter e luna lo bai tin diferente aktividat i treinen pa e personal dirigí riba e tópikonan ku tin di haber ku salubridat, prevenshon di malesa i seguridat riba trabou. E treinennan lo ta bou di enkargo di profeshonalnan ku konosementu di merkado lokal i tambe den eksterior.

Ademas di treinen pa e personal di Selikor, tur siman riba djaluna atardi, durante luna di mei, lo tin charla pa trahadó di Selikor i pa públiko den ouditorio di Selikor. Durante e charlanan lo kubri diferente tópiko ku tin di haber ku kuido personal i salú. Pa partisipá na e charlanan mester inskribí adelantá serka Eunice Scholtz na telefon 434-1335 òf por manda un mail na escholtz@selikor.com pa registrá.

Banda di treinen pa personal i charlanan informativo pa públiko tambe, dia 5 di mei lo bira un dia dediká na e trahadónan di Selikor ku un Marshe di Salú pa e trahadónan di Selikor. Riba e djasabra akí lo tin diferente tènt di kuminda i demonstrashon kombiná ku lekturanan i informashon kombiná ku konseho pa ehersisionan i moveshon di kurpa. Minister Suzy Camelia Römer den su kalidat di Minister di Salubridat Públiko, Medioambiente i Naturalesa tambe lo tei na e parti ofishal di e dia pa hasi re-apertura di e kantina di Selikor ku lo bai ta bou di maneho nobo.

Un kompania no por funshoná sin trahadó, e trahadó na su turno lo funshoná mas optimal si e ta bon di salú. Selikor di su banda ta duna insentivo i tambe informashon na e personal kon por hiba un bida saludabel.

 

Advertisements