Gobièrnu a konmemorá esnan ku a pèrdè nan bida den II Guera Mundial i tambe militarnan ku a sirbi reino hulandes


Gobièrnu a konmemorá esnan ku a pèrdè nan bida den II Guera Mundial i tambe militarnan ku a sirbi reino hulandes

Willemstad – Djabièrnè 4 di mei, den henter reino hulandes a para ketu pa konmemorá tur esnan ku a pèrdè nan bida, sea den un parti di reino hulandes òf na kualkier parti di mundu. A konmemorá esnan ku a bringa den Segundo Guera Mundial, tambe esnan ku a muri den guera òf mishonnan di pas den dekadanan ku a sigui.

Tema di e aña aki ta Resistensia. Durante seremonia na Waaigat Su Ekselensia Minister Presidente Eugene Rhuggenaath a hiba palabra riba e tema aki. E hoben Noruendino Serbonij a duna kontenido na e tema resistensia pa medio di un poema kual el a deklama durante e seremonia.

Su Ekselensia Gobernador sra. Lucille George-Wout a pone krans na monumento na Waaigat na nòmber di gobièrnu di reino hulandes. Minister Presidente a pone krans, asina na nòmber di Gobièrnu i pueblo di Kòrsou duna muestra di rèspèt na esnan ku a pèrdè nan bida pa nos por ta liber awe. Komandante di Marina Real i Komandante di VKC tambe a pone krans na nòmber di nan respektivo organisashon. Despues a sigui representantenan di komunidat Hudiu i famianan di víktimanan kende a konmemorá nan sernan kerí.

Mas lat mainta a tene un di dos seremonia di konmemorashon. E seremonia aki a tuma lugá na Santana Militar na Roodeweg. Stichting Militair Erfgoed Curaçao su presidente, sr. Carlos Sayers, a hiba palabra durante e seremonia na Santana Militar. Mientras Dominee Wojcik a tene un reflekshon. Na Santana Militar a para ketu na tur e militarnan ku di un òf otro manera a sirbi reino hulandes.

==================

Spich konmemorashon 4 di mei
Resistensia

Ekselensia, damas i kabayeronan, famianan,

Awe riba konmemorashon di 4 mei, nos ta konmemorá den union, esnan ku a paga pa NOS libertat ku nan bida den segunda guera mundial i den otro luchanan durante e último dekadanan. Mi ta papia i enfatisá NOS libertat, paso mi ta kere fervientemente den e idea simpel pero profundo ku kada persona su libertat ta mará na libertat di su próhimo.

Na vários momentu den historia nos a enfrentá e simpel bèrdat aki, i sigur den e momentu definitivo ku tabata segunda guera mundial, ku tabata un periodo signifikante tambe pa Kòrsou.

Un momento den historia durante kua nos a realisá, ku ni maske e tamaño di nos baranka ta chikí, nos no por para na banda mientras ku rumannan den Reino a keda tené rehen riba nan propio suela. Ku ni maske ta parse ku e peliger ta leu for di nos porta, nos no tin ku keda leu òf keda ketu. Ku ni maske nos ta liber di okupashon, nos tin di yuda liberá. Aunke nos tabata liber di okupashon, e menasa kontra libertat a toka nos tambe, i tabatin heroenan komun ku a djòin e kausa noble di resistensia durante segunda mundial. En total 165 hende di Antia a pèrdè nan bida den e teritorionan den reino, paso nan a lanta i para pa loke nan ta kere aden. Di un manera of otro, nan a resistí.

I durante tempu di guera nos a konosé resistensia den diferente forma: falta di koperashon òf desobedensia, diseminashon di informashon òf propaganda kontra di e okupadó, protekshon di personanan persiguí òf akshon pa prevení pa heroenan di aliado kai den gara di e enemigu.

Ora mi pensa riba nos heroe i martirnan, òf trata di ‘skucha’ kiko nan lo ta pensa di nan resistensia, mi ta pensa ku nan lo ke pa nos kòrda kiko ta e esensia di resistensia; ku pa su esensia no ta mará na guera ni na tempu…

E esensia di resistensia den kualke forma, ta ku un persona ta realisá ku e no por aseptá e ‘status quo’ òf un situashon indeseá.
Ku ni maske e ta su só, e ta UN ku otronan.
Ku ni maske e reto ta mustra insuperabel, e tin di trata na superá.
Ku ni maske e lucha, sea real of simbóliko ta mustra kaso perdí, e tin di purba. Resistensia ta e konsientisashon ku mi bos, mi esfuerso, mi akshonnan por ta katalisador pa trese mehorashon den e kualke situashon. Resistensia ta asumí e deber pa kambia un situashon penoso, aunke no ta bo responsabilidat òf niun hende a puntrabo òf apuntabo.

Resistensia, na mi pareser, tambe ta asumí responsabilidat pa protehá i kuida tur lokual ta di importansia of balor pa nos komunidat, manera nos herensia, nos bon kustumbernan, nos medio ambiente, nos institutonan, norma i balornan.

E esensia di resistensia pues no ta enkapsulá solamente lucha ora kos ta malu, pero tambe dia aden i dia afó, pa kumpli ku e responsabilidat kompartí pa mantené lokual ta bon i persistí pa hasi bon pa nos mes i otronan den komunidat. Resistensia ta perseverá den asertá nos libertat pa selebrá i salbaguardiá nos derechinan i logra adelanto komún.

Ta esaki tur esnan ku a lucha i resistí pa nos libertat, a resistí p’e: pa un futuro liber kaminda kada hende tin tur posibilidat pa realisá su máksimo potensial. Awe ku nos ta konmemorá, laga nos kòrda esei i komprometé pa sigui lucha pa desaroyo di Kòrsou. Den felis memoria di tur esnan ku a bai laga nos, den NOS den defensa, algun ku nan nòmber ta inskribí riba e monumento aki, laga nos sigui resistí pa logra e kambio ku ta kuminsá ku nos tambe .. den presente.

Pa finalisá mi ta kompartí k’un sita:
“Each time a man stands up for an ideal, or acts to improve the lot of others, or strikes out against injustice, he sends forth a tiny ripple of hope, and crossing each other from a million different centers of energy and daring those ripples build a current which can sweep down the mightiest walls of oppression and resistance.” ― Robert F. Kennedy

Dios bendishoná famia i ser kerínan di esnan ku a resistí promé ku nos.

Advertisements