In memoriam Philip ‘’Fifi’’ Nieuw


In memoriam Philip ‘’Fifi’’ Nieuw

Ayera, 3 di mei 2018, Fakultat General di University of Curaçao Moisés Da Costa Gómez (UoC) a risibí e tristu notisia di fayesimentu di señor Philip “Fifi” Nieuw. Despedida inesperá di señor Nieuw, un persona masha apresiá i kerí den sírkulo amplio, ku un konosementu amplio i inagotabel di enseñansa lokal riba tur nivel, ta un pèrdida grandi tantu pa nos komunidat, komo pafó di nos frontera.

Pa Fakultat General aporte di señor Nieuw tabata krusial. Despues di fushon di e Akademia Pedagógiko anterior ku Lerarenopleiding Funderend Onderwijs (LOFO) señor Nieuw ku su eksperensia amplio komo pedagogo i komo eksperto di enseñansa a logra organisá e proseso pa finalisá estudio na un totalidat manehabel pa e studiantenan ku asina por a pasa den e trayekto ku éksito.

Ku su harí fuerte asina karakterístiko e tabata sa di gana konfiansa, i por a konsider’é un lus guiadó i un baranka pa e promé grupo di studiante di e di kuater aña di LOFO. Pa su studiantenan e tabata un dosente aksesibel i fásil pa aserká. Den e programanan di master profeshonal di idioma, supervishon di e studiantenan di master papiamentu i spañó, serka dje tabata den bon man. Tambe serka e fakultatnan ruman na UoC, kontribushon di señor Nieuw na su manera típiko, ekilibrá i ku un aserkamentu bon pensá a resultá sumamente balioso ora di manehá i guia proseso i hende.

Fakultat General ta masha agradesido na Fifi pa su kontribushon bunita i relevante hasiendo uso di tur su kualidatnan partikular i spesial na fabor di nos enseñansa.

Elisabeth Echteld

Dekano di Fakultat General

University of Curaçao

Moisés Da Costa Gómez (UoC)

Advertisements