Tin sèn pa Insel Air i Festival di Ponton pero pa FDDK i fasilidatnan deportivo nunka no tin sèn


Tin sèn pa Insel Air i Festival di Ponton pero pa FDDK i fasilidatnan deportivo nunka no tin sèn

Kòrsou, 06 di mei 2018

 

Pa medio di e komunikado aki i komo un Parlamentario i alabes un amante di promé ora di deporte, mi a tuma nota di un situashon ku realmente ta hasi mi hopi doló, esaki na momento ku mi a hasi un rekorido den basta area di Kòrsou i mi a tuma nota di e estado deplorabel ku Kòrsou su terenonan ta aden.

Deporte i spesífikamente, fasilidatnan deportivo ta kompletamente neglishá pa ministernan di turno ku a enkargá nan mes ku deporte. Ta komo sifuera ku gobernante nan di turno ku a okupá nan mes ku e kartera di deporte, no ta duna atenshon pa mantené nos kanchanan deportivo pa asina komo un isla chikí nos por sigui produsí talentonan grandi ku ta promové nos produkto turístiko sin ku CTDB tin ku hasi un invershon, manera tabata e kaso ku Ponton Festival.

Nos boka konstantemente ta yen ku mester baha kriminalidat bou di hubentut, pero di e otro banda gobièrnu no ta mantené fasilidatnan deportivo pa asina hóbennan por rekreá i desaroyá talentonan deportivo ku nan ta dispone di dje. I asina komo Kòrsou nos saka lo máksimo for di nos hubentut, ta di lamentá ku gobiernu kada bes di nobo ta skohe pa un grupo chikí na lugá di bin ku un maneho kaminda pueblo, pero partikularmente nos hóbennan ta sali benefisiá.

Tristu ta ku nos tin un fundashon ku ta enkargá ku deporte na Kòrsou ku ta FDDK pero gobièrnu di Kòrsou no tin un maneho pa loke ta trata deporte i fasilidatnan di deporte. Selekshonnan di deporte i deportistanan individual ku tin ku bai eksterior pa representá Kòrsou ta pasa doló di kabes pa dispone di fondo pa por yega na rekurso finansiero pa nan hasi e biahe.

A skohe pa hinka miónes den Insel Air, pero no por fasilitá FDDK ku finansa pa por kuminsá bek ku deporte eskolar pa nos hóbennan, a skohe pa hinka míles di florin pa un festival fantasma ku aparte ku pueblo a pèrdè nan sèn di belasting, hóbennan a pèrdè mas o ménos shen mil florin ku por a kumpra material deportivo pa nan.

Frakshon di MFK tin gana di sa kiko ta e plannan konkreto di minister enkargá ku deporte pa loke ta maneho deportivo, kon ta bai atendé ku nos fasilidatnan deportivo i ku terenonan den estado deplorabel i peligroso pa nos hóbennan. A yega tempu pa hinka un tiki plaka den nos hubentut i stòp di di hinka nos plaka di belasting den saku di esnan ku no ta kontribuí ku desaroyo deportivo di nos hóbennan.

 

Na nòmber di frakshon di MFK,

Gilbert Doran

Parlamentario Frakshon di MFK

Advertisements