EUROPEAN UNION’S GENERAL DATA PROTECTION REGULATION TA DRENTA NA VIGOR PA KORSOU TAMBE ENTRANTE MEI 2018


EUROPEAN UNION’S GENERAL DATA PROTECTION REGULATION TA DRENTA NA VIGOR PA KORSOU TAMBE ENTRANTE MEI 2018

Willemstad- Protekshon di informashon personal di kada persona ta algu sagrado. Mundialmente esaki ta keda protehá, mas ainda mirando loke ta pasando den e mundu sibernétiko último añanan.

Entrante 25 di mei e asina yamá European Union’s General Data Protection Regulation (GDPR) ta drenta na vigor. Kòrsou tambe ta suheto na kumplimentu ku regulashon dor di GDPR (www.eugdpr.org).

Esaki ta nifiká ku tur organisashon gubernamental, privá òf sin e meta pa hasi ganashi i ku tin informashon/data di hende( ku ta biba, traha òf ta biaha dor di pais den Union Europeo) ku ta forma parti di Union Europeo) den nan banko di informashon (sea digital òf den forma tangibel) , mester por gosa di e protekshon manera indiká pa e regulashon.  No kumplimentu por resultá den multanan mionario. Maske e regulashon a keda aseptá na 2016 rònt mundu, tòg ta awor ku e ta den porta mayoria ta bira konsiente ku mester tuma e pasonan nesesario pa ta kla pa kumpli ku e regulashon aki. Gobièrnu di Kòrsou, Bureau Telecommunicatie en Post (BT&P) i Cyberbloc ta inisiá un ofensiva pa konsientisá tur ku ta suheto na e GDPR pa tuma e pasonan mínimo pa evitá reperkushon unabes GDPR drenta na vigor 25 di mei próksimo i pa nan tuma pasonan pa despues sigui kumpli ku e protekshon di dato personal manera preskribí pa GDPR.

 

Un bista kiko ta GDPR

Pa medio di GDPR informashon ku por keda atribuí na un persona ta keda protehá.  E hende na kua e dato ta pertenesé ta haña mihó protekshon i mas kontròl riba su datonan personal den bankonan di informashon. Asina e por pidi pa wak ki informashon bo ta poseé di dje i por pidi pa sak’é for di bo banko di informashon. Ehèmpelnan di esaki ta number di telefòn, adrès di e-mail, kustumber di kompra, number di reibeweis, number di kuenta di banko, number i password pa subi wèpsait, informashon di empleadonan, informashon médiko i hasta IP adrès. E regulashon su intenshon ta pa prevení mal uso di informashon personal ku fásilmente, den kasonan mas ekstremo, por keda bendé riba merkado informal i hasta usá pa ekstorshon.

Ta bon pa tur hende ta konsiente, ku den kaso ku sali na kla ku bo entidat òf instansia tabatin kiebro den bo banko di informashon i bo no a denunsiá esaki dentro di 72 ora na e outoridatnan kompetenete na Europa, bo ta kore rísiko di risibí un but di maksimal 20 mion Euro òf 4% di loke ta bo ingreso mundial.  Pues ta di sumo importansia pa entidatnan i kompanianan tin nan prosedura i infrastruktura kla pa raportá dentro di 72 ora dado kaso tin un kiebro den nan banko di informashon.

 

Kòrsou i GDPR

Un estudio realisá a demonstrá ku alrededor di 50% di kompania i entidatnan na Oropa ta kla pa por atendé ku e regulashon aki. Den Karibe esaki ta entre 5 pa 7% i Kòrsou no ta un eksepshon.

Aparte ku kada siudadano di nos isla ta gosa di e privilegionan ofresé pa e regulashon, nos tin hopi interakshon komersial ku Oropa i pa e motibu aki ta importante pa entidatnan lokal ta kla pa atendé ku maske ta lo mínimo. Vários sektor i kompania ta tumando e pasonan nesesario pa haña un bista kon nan situashon inisial ta dor di a hasi análisis di riesgo i kuminsá tuma pasonan pa por ta kla i kumpli ku e regulashon entrante mei próksimo. Cyberbloc ta un organisashon ku ta trahando riba konsientisashon di nos komunidat i tambe asistí kompania i entidatnan pa nan ta kla pa kumpli ku GDPR.

Introdukshon di GDPR aparte di ta trese obligashon pa organisashonnan ta krea tambe un área nobo di trabou kaminda entidatnan mester krea ekspertisio interno òf atkerí sosten ku mester pèrkurá pa protekshon di data personal. BTP, komo parti di su trabou di garantisá protekshon sibernétiko, ta preparando pa por ofresé e preparashon nesesario i tambe sertifikashon di esnan ku ta hasi e trabou.

Ofensiva pa konsientisá komunidat

Den e kuadro di krea mas konsientisashon pa e GDPR i su implikashonnan Gobièrnu di Kòrsou, Bureau Telecommunicatie & Post i Cyberbloc a uní forsa.  E intenshon no ta pa kousa pániko innesesario. Kontrario e ta netamente pa kada un di nos hasi nos análisis i pèrkurá pa nos por kumpli ku lo mínimo dia 25 di mei, banda di start e proseso interno pa kumpli permanentemente ku e regulashon. Aparte di por bishita e wèpsait di Cyberbloc (www.cyberbloc.com) pa mas informashon. Pronto lo por bishitá tambe www.btnp.com.  Atrabes di medionan lo sigui konsientisá kiko ta GDPR, kiko ta su implikashon, kon bo mester aserká kumplimentu ku e regulashon, pero tambe kiko minimalmente bo mester hasi pa por ta kla ku lo mínimo pa dia 25 di mei próksimo. Den kaso ku tin pregunta semper por mail ekspertonan di BT&P na number 463-1700 òf e-mail na info.gdpr@burtel.cw.

 

Advertisements