Introdukshon di reunion públiko di parlamento dia 7 mei 2018


Willemstad, 7 mei 2018

Tópiko: Introdukshon di reunion públiko di parlamento dia 7 mei 2018

Manera nos tur sa Parlamento ta kontrolá maneho di gobièrnu, ta traha riba proyektonan di lei i tambe, huntu ku gobièrnu, aprobá esakinan. Ta nos ta representá pueblo komo e órgano mas haltu di pais. Nos tin podernan spesial pa ehersé nos tarea mas mihó posibel.

Pueblo meresé ku nos ta representá nan di manera digno, dor di demonstrá rèspèt pa e mesun pueblo. Nos mester ta e bon ehèmpel, dor di hasi polítika na nivel i konstruktivo, semper sostené ku echo i no insinuashonnan dudoso i sin base. No opstante kada un su diferensia polítiko, ta opvio ku pa por representá pueblo bon, nos mester respetá otro tambe den tur sentido di palabra dor di ta kritiko i tòg konstruktivo, aportando positivamente na bienestar i desaroyo di Kòrsou. Laga nos ban hiba un polítika positivo den e sala aki, dor di funshoná di un forma profeshonal. Tambe no lubidá di respetá otro su tempu, i tambe tempu di pueblo, dor di simplemente yega na ora pa reunionnan start na e ora anunsiá.

Na kuminsamentu i na final di kada reunion nos ta kanta den nos himno “Ban duna di nos parti p’e isla prosperá, Laga nos uni forsa p’asina triunfá”. Laga nos por lo ménos kuminsá biba esaki i ban demonstrá onor i lealtat na Nos patria.

Situashon ekonómiko i finansiero di pais ta leu for di loke mester ta, pues laga nos tambe komo parlamento, duna nos aporte konkreto na bahada di gastunan di nos pais. Ta tempu pa nos uni forsa p’asina huntu nos triunfá.

Nos pueblo meresé mihó, laga nos hasi loke nos tin ku hasi komo parlamentario bon, aunke ta pa malu.

 

 

Presidente di parlamento

 

 

  1. ing. W. W. Millerson
Advertisements