Orashon djarason 9 di mei 2018


Orashon djarason 9 di mei 2018

‘Esnan ku a eskoltá Pablo a hib’é Atena. Despues nan a bai bèk ku e rospondi di Pablo ku Silas i Timoteo mester djòin e mas pronto posibel. Pablo a lanta para dilanti di konseho di Areo Pago i bisa: ‘Habitantenan di Atena, den tur kos mi ta mira ku boso ta hende mashá religioso. Pasobra ora mi tabata kana rònt den boso siudat i tabata opservá boso santuarionan, asta mi a topa un altá ku e inskripshon: “Na un dios deskonosí”. Wèl, loke boso ta adorá sin konosé, ami ta anunsiá boso. Dios ku a krea universo i tur loke e ta kontené, e Señor di shelu i tera, no ta biba den tèmpel trahá pa man di hende. Ni E no tin mester di nada ku man di hende por dun’é; E mes ta duna bida, rosea i tur sobrá kos na tur hende. For di un hende El a krea tur pueblo pa biba rònt mundu. El a determiná nan temporadanan i e límitenan di nan teritorio i E tabata ke pa e pueblonan purba hañ’É dor di busk’É i purba tòch’E. Di pursi E ta serka kada un di nos. Pa sita boso mes poetanan: “Ta pa medio di Dios nos ta biba, move i eksistí” i “Nos ta su desendiente.” Wèl, si nos ta desendiente di Dios, nos no mester kere ku Dios ta manera e imágennan di oro, plata òf piedra, trahá i diseñá dor di hende. Dios a laga e tempunan di ignoransia pasa numa, ma awor E ta ordená pa tur kaminda tur hende kombertí. Pasobra El a fiha un dia riba kua lo E husga henter mundu segun hustisia pa medio di un hòmber ku El a apuntá. El a proba esaki na tur hende pa motibu ku El a lant’É for di morto.’ Ora nan a tende Pablo papia di resurekshon di morto, algun di nan a hasi bofon di dje; ma otro a bisa: ‘Nos ke tende mas di esei un otro bia.’ Asina Pablo a bandoná e reunion. Algun hende a djòin Pablo i aseptá fe; entre nan tabatin Dionisio, un miembro di e Areo Pago, un muhé ku yama Damaris i algun otro hende mas.’ Echonan 17:15,22-34

 

Advertisements