DI DOS EDISHON DI LUNCHEON ORGANISÁ PA JCI UC I JCI CLIC Ku E Tópiko: Diversidat i Flèksibilidat na Trabou


DI DOS EDISHON DI LUNCHEON ORGANISÁ PA JCI UC I JCI CLIC

Ku E Tópiko: Diversidat i Flèksibilidat na Trabou

 

Willemstad, 9 di mei 2018 – Djabièrne 1 di yüni 2018 JCI UC huntu ku JCI CLIC ta organisá pa di dos aña konsekutivo un Luncheon titulá ‘Feed Your Mind’ ku dos oradó special, esta Minister Sra. Susanne Camelia-Römer i Miembro di Parlamento Sra. Elsa Rozendal.

JCI ta hopi bon konosí internashonalmente pa diferente proyekto duradero i tambe evento edukativo, organisá pa miembronan di e organisashon mes ku e solo meta pa kontribuí na desaroyo di e ser humano i di nan komunidat. JCI United Citizens of Curaçao (JCI UC) i JCI Creative Leaders in Curaçao (JCI CLIC) tambe ta forma parti di e plataforma di JCI i tin komo mishon pa empoderá un i tur ku ta biba aki na Kòrsou pa medio di oportunidatnan ku ta fomentá desaroyo personal, profeshonal, i di nos komunidat en general. Di forma ku mas siudadano ta sinti e nesesidat pa krea un kambio positivo. Ku tur nanishi den e mesun direkshon, JCI UC i JCI CLIC a uní forsa pa organisá pa di dos biaha un Luncheon titulá ‘Feed Your Mind’.

Luncheon ta nada mas i nada menos ku un seminario di 2 ora den kombinashon ku un ‘lunch’. Aña pasa invitadónan tabatin e honor di por a forma parti di e presentashon Curaçao as a smart Nation presentá pa Minister Sr. Steven Martina. Debí na hopi petishon di tur persona ku a keda enkantá ku e evento, JCI UC i JCI CLIC a optá pa ripití e Luncheon, e biaha aki ku e tópiko: Diversidat i Flèksibilidat na Trabou. Durante e enkuentro aki, diferente kompania ta manda algun representante pa ampliá nan konosementu riba e tópiko en kuestion. Mirando ku e tema ta sumamente benefisioso pa progreso di e trahado, e kompania, i tambe ekonomia di Kòrsou. Meta di e proyekto Luncheon e aña aki ta, pa pone énfasis riba e importansia di diversifikashon i konsientisá i alabes stimulá empresanan pa eksplorá posibilidatnan pa tin mas flèksibilidat na Kòrsou.

JCI UC i JCI CLIC ta konvensí ku e aña aki tambe ta bai bira un otro éksito danki na e konosementu i eksperensia di nos dos oradónan spesial, esta Minister Sra. Susanne Camelia-Römer i Miembro di Parlamento Sra. Elsa Rozendal ku ta bai elaborá riba e tópiko: Diversidat i Flèksibilidat na Trabou. E tópiko ta e punto di diskushon aktual serka hopi eksperto i ta e metodó preferí pa dil ku e influensia di globalisashon i avansé teknológiko riba struktura i operashon di un organisashon. Pues esaki ta oportunidat ku bo no por pèrdè. Mientras ku e presentashonnan ta andando, tur invitadó por saboriá un sukulento kuminda di tres plato. I tambe interkambia di opinion i idea ku koleganan den e mundu profeshonal durante un mèrdia ameno aya na Renaissance Curaçao Resort & Casino. Tur esaki ta tuma lugá djabièrne 1 di yüni 2018 di 12:00 pa 14:00. Tur kompania ku ta deseá kumpra karchi pa su empleadonan por tuma kontakto ku nos na jci.fundraising@gmail.com.

“Konosementu ta tesoro di e sabio.”

 

Advertisements