Parlamentario Jeser El Ayoubi: Mester bòltu i responsabilisá kada depchi pa kontinuashon i konfiabilidat di HNO!


Parlamentario Jeser El Ayoubi: Mester bòltu i responsabilisá kada depchi

pa kontinuashon i konfiabilidat di HNO!

 

Konstrukshon di Kòrsou su Hospital Nobo Otrobanda (HNO) ta un proyekto ku nos tur mester mira i honra su potensial kaminda kalidat di kuido i servisio mester bira un di e balornan klave pa Kòrsou i Karibe.

HNO, e proyekto magno ku masha hopi inklaridat. Falta di kuentanan anual konfiabel, desperdisio di plaka, mal komunikashon, palabrashonnan inkompetente, diskrepansia entre stakeholder i kontratista, claim, beslag, kaso den korte, partisipashon di gobièrnu komo “mediador/árbitro” i un supervishon  ministerial i di parlamentonan di turno defisiente a pone ku awe, despues di mas ku 5 aña, nos Hospital Nobo ainda ta hiba un retraso riba tur area.

Ta importante pa nos realisá ku mester bòltu kada depchi pa nos por kontinuá e proseso di HNO na un manera hopi mas efektivo, responsabel i konfiabel. No por sigui ku mas desperdisio di plaka di pueblo. Ta basta awor.

No ta un sekreto ku HNO lo habri ku debe pero ta nos deber di traha riba alternativanan real i efisiente pa adelanto di HNO pa di e forma aki evitá di krea espasio pa mañan mester ‘bende’ HNO tambe ku un partner nobo.

HNO mester inspirá trankilidat i garantia pa nos hendenan i pa nos ekonomia. Laga nos tur pone e mindset korekto pa por hasi esaki posibel.

Hospital Nobo ta di nos i nos tur mester kuid’e!

Advertisements