Bureau Telecommunicatie en Post ta hasi un donashon di ekipo pa midi radiashon di solo na Meteo


Bureau Telecommunicatie en Post ta hasi un donashon di ekipo pa midi radiashon di solo na Meteo

Willemstad – Dia 14 di sèptèmber sr. Franklin Sluis, direktor di Bureau Telecommunicatie en Post (BTP) i sr. Albert Martis, direktor di Servisio Meteorológiko (Meteo) a firma un akuerdo di donashon. E donashon ta trata di un ekipo spesial pa midi i registrá radiashon di solo outomátikamente. E firmamentu a tuma lugá den presensia di Minister di Tráfiko, Transporte i Planifikashon Urbano, sra. Zita Jesus-Leito.

Den kuadro di e tareanan komo reguladó di energia, BTP a atkerí un aparato pa registrá radiashon di solo pa asina aportá na e maneho di energia alternativo. E ekipo menshoná ta konsistí di diferente parti ku huntu ta duna e resultado di kuantu ora solo ta kima i kon fuerte e ta kima. Outomátikamente e ekipo mes ta registrá e resultado den sifra di moda ku Meteo por prosesá e datonan aki i pone esakinan disponibel na públiko general.

Aktualmente Meteo ta usa un pyranometer pa hasi e midimentu di solo. Esaki ta un bola di glas ku ta kima un papel speshal pa registrá e kantidat di ora ku solo ta kima riba un dia. Anochi ta kambia e papel aki. Despues un eksperto ta analis’é i hinké den e sistema di base di dato di klima. E departamentu di Klimatologia na su turno ta usa e dato pa duna informashon na komunidat.

Meteo ta den un proseso di outomatisashon i e sistema aki ta fet bon den dj’e. Tambe e donashon aki ta kai den un bon tera ya komo e ta evitá Meteo di hasi un invershon pa un ekipo asin’aki. Uso di e ekipo aki ta hisa e kalidat di servisio ku Meteo ta duna i alabes ta hasi e trabou muchu mas efisiente. E artefaktonan pa midi solo ku ya Meteo ta disponé di dje, ta keda funshoná banda di e ekipo aki pa un bon tempu mas.

Komo parti di e akuerdo aki BTP lo risibí tur dato i informashon ku Meteo ta bai produsí pa asina kontribuí na e tarea di supervishon. Na mes momentu e akuerdo ta fortalese e koperashon entre e dos entidatnan. Minister Zita Jesus-Leito ta aploudí e akuerdo aki pasobra no unikamente e ta baha gastu pero e ta hiba tambe na miho resultado den dunamentu di servisio.

IMG-20180914-WA0021

 

IMG-20180914-WA0023

Advertisements