KÒRSOU KONSIENTE, DIA NASHONAL PA LIMPIEZA


KÒRSOU KONSIENTE, DIA NASHONAL PA LIMPIEZA

Willemstad – Dia 15 di sèptember ta world clean-up day. Minister di Salú, Medio Ambiente i Naturalesa (GMN) ke hasi mas hende konsiente ku ta solamente huntu nos por logra un Korsou limpi ku un medio ambiente ku ta benefisioso pa nos salú. Pesei GMN huntu ku algun ministerio mas i tambe ku organisashon/empresanan privá,  ta sostené un dia di limpiesa riba e djasabra aki. Un yamada di sra. Camelia-Römer pa tur hende sali nan kas yuda kaminda bo por, esnan ku no por hasi esei, limitá bo mes maske ta pa limpia dilanti bo porta di kas. Un esfuerso konhunto lo hasi nos Korsou un dushi isla pa biba ariba.    

Rὸnt mundu ta tene dia di limpiesa riba 15 sèptèmber pa nos por krea un mundu mas limpi pa nos tur i nos yunan. Hende mester bira mas konsiente ku e sushedat ku nos ta kreando i ku tiki tiki ta bai ta destruí nos planeta. Asina nos ta mira ku tin hopi sushi ku ta keda di dump na luganan illegal. Esaki ta trese hopi problema pa e habitantenan den barionan. Tin hende ku ta sufri di malesanan kaminda nan no por dil ku e sushedat aki paso e ta hasi nan malu.

Komo suidadano nos mester realisá ku ta hopi esfuerso gobiernu ta hasi pa tene nos dushi isla limpi i ku e sushedat aki ta keda kreá pa nos hendenan mes. Pa aña gobièrnu ta rekohé basta  mion kilo di sushi na sitionan ilegal. Majan nos lo bai registrá kuantu e kantidat di sushi lo ta atrobe. Ku koperashon di Selikor lo por depositá sushi grátis na mal pais.

Hecho ta, ku nos mester hasi mas esfuerso pa tene nos pais limpi i ora nos mira tin hende ta dùmp sushi ilegal nos mester avisá outoridat konserní pa resolvé e problema aki. Tambe ta urgí tur hende pa bira mas konsiente riba uso di plastik. Uso di plastik rὸnt mundu ta pasando limite i aki algun aña nos lo tin mas plastik den laman en bes di piska. Kada hende tene nan alrededor limpi. Esei ta bo kura, kaya i bario mester ta limpi pa nos por sinti mas mihó.

gobiernu

Advertisements