Parlamentario Curtley Obispo: Normanan finansiero for di 10 òktober 2010 pa ku finansa públiko di Pais Kòrsou.


Normanan finansiero for di 10 òktober 2010 pa ku finansa públiko di Pais Kòrsou.

Parlamentario Curtley Obispo den e reunion di Parlamento di Kòrsou di dia 11 mart 2019 a bolbe trese dilanti ku e no por kambia historia. Ta fundadornan di Pais Kòrsou a pone e fundeshi ku awe nos tin un Areglo di Estado di Kòrsou (nos lei máksimo) ku normanan finansiero i tambe e Lei di Reino di Supervishon Finansiero di Kòrsou i Sint Maarten. Tur esaki a bira posibel danki tur i tur e fundadornan di Pais Kòrsou ku a kana henter e trayekto di Pais Kòrsou inkluyendo e último Bestuurscollege di Kòrsou ku tambe a firma riba 9 sèptèmber 2010 den e Konferensia di Mesa Rondó, aya den e Ridderzaal na Den Haag, Hulanda. Pa asina awe Pais Kòrsou ta un realidat ku normanan finansiero pa ku finansa públiko.

Parlamentario Curtley Obispo a mustra ku ta nos fundadornan di Pais Kòrsou a buta normanan finansiero for di 10 òktober 2010 den nos Areglo di Estado di Kòrsou kual ta entre otro artíkulonan 84, 85 insiso 2 i 4 kual ta indiká ku:(1) tur kontribuyente di belasting segun leinan di Pais Kòrsou tin ku kontribuí na tempu segun leinan di Pais Kòrsou pa asina na tempu por finansiá e gastunan kolektivo presupuestá di Pais Kòrsou.Tur esaki ku e meta pa sigui traha riba bienestar i progreso di nos Pais Kòrsou;(2) Pais Kòrsou no por i no tin mag di fia pa gastunan kolektivo. Pa e motibu aki e aporte na tempu di tur i tur kontribuyente di belasting tempu segun leinan di Pais Kòrsou ta super importante i (3) ehekushon di presupuesto di Pais Kòrsou di e aña koriente i aña nan ku ta sigui mester tin balansa positivo entre entradanan di kontribuyentenan di belasting i gastunan kolektivo di Pais Kòrsou. Na momento ku tin un défisit (un resultado negativo) den ehekushon di presupuesto di Pais Kòrsou mester kompensá esaki pa e presupuesto di e aña koriente i di añanan ku ta siguí. Pa asina por tin e balansa positivo bek  den ehekushon di presupuesto pa loke ta entradanan di kontribuyentenan di belasting i gastunan kolektivo di Pais Kòrsou.

Parlamentario Curtley Obispo a mustra tambe ku ta nos fundadornan di Pais Kòrsou tambe entre otro a akordá tambe e artíkulo 15 di e Lei di Reino di Supervishon Finansiero di Kòrsou i Sint Maarten, kual ta e garantia pa kumpli ku entre otro e normanan finansiero di artíkulo 85 insiso 2 i 4 di Areglo di Estado di Kòrsou. Pues for di 10 òktober 2010 e fundeshi di Pais Kòrsou ta ku kada kontribuyente di belasting segun leinan mester kontribuí na tempu pa asina por paga na tempu gastunan kolektivo di Pais Kòrsou presupuestá pa entre otro: (a) supsidionan na fundashonnan, fundashonnan di Gobièrnu di Kòrsou i kompanianan anónimo di Gobièrnu di Kòrsou, (b) kontribushon na e sektor di enseñansa di Kòrsou, (c) gastunan di henter e aparato gubernamental i órganonan di estado pa sirbi, yuda i protehá nos komunidat, (d) gastunan di interes pa loke ta fiansa, (e) penshun di empleadonan públiko inkluyendo vut i duurtetoeslag, (f) ònderstant i (g) kontribushon na e fondonan di SVB: penshun di behes, lei di labizjan i seguro básiko.

Potret 2019 parlamentario Curtley Obispo vershon 2

Advertisements