Kuentanan anual 2014 te ku 2017 di Pais Kòrsou.


Kuentanan anual 2014 te ku 2017 di Pais Kòrsou.

Parlamentario Curtley Obispo durante e reunion di Parlamento di Kòrsou di dia 11 mart 2019 a indiká ku dia 24 aprel 2018, e la manda un karta pa Minister di Finansa señor Kenneth Gijsbertha tokante e trayekto di fiha kuenta anual (jaarrekeningtraject) 2015 te ku 2017 di Pais Kòrsou. E karta tabata basa entre otro riba e realidat ku Gobièrnunan anterior ku a goberná entre 10 òktober 2010 te ku 22 desèmber 2016, nunka no a logra di entrega na tempu na Parlamento di Kòrsou e kuentanan anual (jaarrekening) di añanan 2010 te ku 2015. 

A base di e rapòrtnan di Kontrolaria General di Desèmber 2018 i Febrüari 2019, parlamentario Curtley Obispo ta aploudí ku Minister di Finansa señor Kenneth Gijsbertha huntu ku henter e Gobièrnu di Kòrsou a hasi e trabou diligente i rápido pa den ménos ku 1 aña di tempu, a sòru pa e kuentanan anual di Pais Kòrsou 2015 te ku 2017 a wòrdu kontrolá dor di SOAB i Kontrolaria General di Kòrsou. Pa asina Gobièrnu di Kòrsou por sigui traha i entrega tambe e 3 konsepto di proyektonan di lei pa fiha e kuentanan anual di Pais Kòrsou over di añanan 2015 te ku 2017. Tambe tin e posibilidat real ku e aktual Gobièrnu di Kòrsou por entrega na tempu na Parlamento di Kòrsou den aña 2019 e kuenta anual 2018 di Pais Kòrsou. Pues pa promé biaha den historia di Pais Kòrsou for di 10 òktober 2010 tin e posibilidat real ku un Gobièrnu di Kòrsou por duna kuenta i rason na tempu na Parlamento di Kòrsou. Gobièrnu di Kòrsou mester hasi tur esfuerso pa logra esaki pa Pais Kòrsou.

P’esei pa ku e tópiko aki parlamentario Curtley Obispo a hasi e siguiente preguntanan durante e reunion aki: (1) ki dia Parlamento di Kòrsou lo risibí e memoria di kontesta pa loke ta e proyekto di lei pa fiha kuenta anual 2014 di Pais Kòrsou? (2) Ki dia Parlamento di Kòrsou lo risibí e 3 otro konsepto di proyekto di lei pa fiha kuentanan anual 2015 te ku 2017 di Pais Kòrsou?. Tambe parlamentario Curtley Obispo ta sostené henter e trayekto (“roadmap”) di Gobièrnu di Kòrsou  pa mehorá e sistema di atministrashon finansiero i kontabilidat (financieel beheer), pa asina no mas tarda ku 15 òktober 2022 yega na un kuenta anual di Pais Kòrsou 2021 ku tin un “goedkeurende verklaring” di Kontrolaria General di Kòrsou i SOAB.

Potret 2019 parlamentario Curtley Obispo

Advertisements